Yazghuchi we zhurnalist gülbehrem xoshayéwa

Qazaqistanda yashawatqan Uyghurlar arisida her sahede körünerlik netijilerni yaratqan Uyghur xanim-qizlirimu az emes. Nöwette qazaqistandiki “Turan” uniwérsitéti chet'el tilliri bölümining bashliqliq wezipisini ötewatqan doktor gülbehrem xoshayéwa del shularning jümlisidindur. Qazaqistanda tughulup chong bolghan gülbehrem xoshayéwa xanim terjimeshunash bolupla qalmastin, belki yene nurghunlighan nadir edebiy eserlerningmu aptoridur. U ziyaritimizni qobul qilip öz ijadiyetliride pütkül insaniyetke ortaq bolghan téma-hörlük we muhebbet témisining chong salmaqni igileydighanliqini bildürdi.

Undaqta gülbehrem xoshayéwa kim?

Gülbehrem xoshayéwa 1957-yili almuta wilayiti Uyghur nahiyesining ghaljat yézisida tughulup, 1978-yili almuta chet el tilliri institutining in'gliz tili fakultétini tamamlighan. U 1979-yili hazirqi “Uyghur awazi” gézitxanisining edebiyat we sen'et bölümliride 20 yil zhurnalist bolup ishligen we bu jeryanda u qazaqistanda tonulghan hézim bexniyazof, sawutjan memetqulof, yoldash azamatof, dolqun yasinof we abduméjit döletofqa oxshash dangliq sha'ir, yazghuchilar we zhurnalistlar bilen tonushqan.

Gülbehrem xoshayéwa 1999-yilidin 2016-yilighiche el-farabi namidiki qazaq milliy uniwérsitétining iqtisad we soda, qanun we sherq fakultétlirida bakalawrluq magistirliq, doktorluq ilmiy unwani üchün oquwatqan oqughuchilargha in'gliz tilidin ders béridu. U bu jeryanda “In'gliz tilidiki eserlirini rus we qazaq tillirigha terjime qilishtiki qiyinchiliqlar” témisi boyiche ilmiy tetqiqat bilen shughullinidu. U mezkur emgikini 2006-yili astana shehiride üch tilda, yeni in'gliz, rus we qazaq tillirida utuqluq yaqlap, filologiye penlirining kandidat doktori ilmiy unwanigha muyesser bolghan.

Gülbehrem xoshayéwaning 2004-yili “Derdi yoq demsen méni”, 2008-yili “Men séni qiyalmaymen” we 2010-yili qazaq tilida “Köndim-a'u saghan taghdirim”, 2017-yili “Yürektin chiqqan bir tamche yash” namliq hékayiler toplamliri “Mir” neshriyatida neshir qilin'ghan.

Yazghuchining köpligen hékayiliri, powést, ochérkliri we ilmiy maqaliliri Uyghur, qazaq, rus, özbék, türk tillirida her xil metbu'at sehipiliride üzlüksiz élan qilinip turghan.

2013-Yili alimning ilmiy tetqiqatliri asasida “In'gliz tilini terjime qilish usulliri” namliq monografiyesi yoruq körüp, aliy oqush orunlirida mexsus oqush dersliki süpitide paydilinishqa tapshurulgha n. Mezkur emgek qazaqistan alimliri teripidin yuqiri bahalargha érishken.

Qazaqistan yazghuchilar ittipaqining ezasi gülbehrem xoshayéwa nöwette “Turan” uniwérsitéti chet el tilliri bölümining bashliqliq wezipisini ötimekte.