Xitay Uyghur mejburiy emgikidin paydilinip yawropa sana'itini “Yep kétip” baramdu?

Myunxéndin ixtiyariy muxbirimiz ekrem teyyarlidi
2024.09.18
Volkswagen-Uyghur-emgek
Rebel pepper

Xitayning shé'in we tému arqiliq qiliwatqan tor sodisining yawropa shirketlirini éghir ehwalda qoyuwatqanliqi uzundin buyan munazire témisi bolup kelgen bolsimu, yawropa ittipaqi bu jehette téxi keskin bir qarar alalmighan idi. Buninggha ulapla xitayning erzan bahaliq tokluq aptomobillirining yawropa bazarlirigha tökme qilinishi yawropa aptomobil sana'itigimu éghir xiris peyda qildi. Xitaydin künige 400 ming xalta tawar kiriwatqan gérmaniyede nurghunlighan soda sarayliri taqilipla qalmay, xitayning erzan bahaliq tokluq aptomobilliri bilen bolghan riqabetke berdashliq bérelmey, gérmaniyediki aptomobil zawutlirimu taqilishqa bashlidi.

Aldinqi hepte wolkiswagén gérmaniyediki bir zawutini taqap uzun ötmey, awdi aptomobil zawutimu bélgiyediki bir zawutini taqighan idi. Buning bilen qanche minglighan ishchi ishsiz qélip, namayishlar ötküzüwatatti. “Firansiye awazi” radiyosi 18-séntebir élan qilghan “Bélgiyening sana'iti lingship qaldi, bizni xitaylar yéwetti” namliq xewerde bayan qilishiche, aldinqi künliri bélgiyedimu namayishlar élip bérilghan. Bélgiyediki köpligen zawutlar arqa-arqidin taqilip, nurghunlighan kishiler xizmet ornidin ayrilip qalghan. Bu kirizisni xitayning erzan bahaliq tawarliri keltürüp chiqarghan bolghachqa, kishiler “Bizni xitaylar yewetti” déyishken.

Yawropa sana'itini “Yewétip barghan” xitayning bu erzan bahaliq malliri Uyghur mejburiy emgikining mehsulliri bolup, norwégiyediki weziyet analizchisi bextiyar ömer ependining bildürüshiche, yawropa ittipaqining xitayning Uyghur mejburiy emgikige chétilidighan bu tawarlirini chekleshte ünümlük bir tedbir qollinalmasliqtek bu boshangliqi, Uyghur mejburiy emgikining dawamlishishigha türtke bolup qalmaqta iken. Gérmaniyediki weziyet analizchisi gheyur qurban ependimu bu heqte öz qarashlirini ipade qilip ötti.

“Bélgiyening sana'iti lingship qaldi, bizni xitaylar yewetti” namliq xewerdin melum bolushiche, bu yil kirgendin buyan, 4-ayda bélgiyening aptobus zawuti, 6-ayda toqumichiliq we ximiyelik buyumlar guruhining ikki zawuti, 9-ayda dunyadiki eng chong shakilat zawuti hemde en'eniwi eynek zawutliri arqa-arqidin taqilip qélip, qanche 10 minglighan adem ishsiz qalghan. Buninggha egiship, bélgiyening aldinqi qatardiki bashqa shirketlirimu xitaygha “Yéyilip kétish” ke bashlighan.

Gérmaniye metbu'atliridiki xewerlerdin melum bolushiche, uzun yillardin buyan “Uyghur mejburiy emgiki bilen chétishliq” dep eyiblinip kéliwatqan dunyadiki eng chong aptomobil sana'iti guruhi bolghan wolkiswagén xitaygha “Yéyilip kétish” sewebidin, eslidiki 1-orundin hazir 3-orun'gha chüshüp qalghan. Xitayning BYD qatarliq tokluq aptomobilliri 1-orunni, amérikaning tésla aptomobili 2-orunni igiligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.