Amérika islamiy munasiwetler kéngeshi amérikaning ikki xitay shirkitini jazalighanliqini qarshi aldi

Amérikadiki eng chong musulman teshkilatlirining biri bolghan “Amérika islamiy munasiwetler kéngeshi” amérika ana weten xewpsizliki ministirliqining yene ikki xitay shirkitini Uyghur mejburiy emgiki sewebidin jazalighanliqini qarshi alidighanliqini élan qildi.

Bu teshkilatning 3-öktebir élan qilghan bayanatida, teshkilatning mu'awin diréktori édward ehmed mishél, “Biz xitay hökümitining Uyghur musulmanlirini qul emgikige sélishi we irqiy qirghinchiliq qilishidin payda éliwatqan bu shirketlerni hem bashqilarni cheklishini qarshi alimiz” dégen. Uning tekitlishiche, bu teshkilat burunmu mejburiy emgektin paydilan'ghan xitay shirketlirini chekleshni qarshi alghaniken.

Dunyadiki musulman elliri we türk döletliri xitayning Uyghurlargha irqiy qirghinchiliq qilishini körmeske séliwatqanliqi, hetta b d t da Uyghurlar mesilisi boyiche xitayni qollawatqanliqi tüpeylidin eyibliniwatqan bir peytte, amérikaning eng chong musulmanlar teshkilatining Uyghur mejburiy emgikidin paydilan'ghan xitay shirketlirini jazalashni qarshi élishi, diqqet qozghimaqta.

Amérika ana weten xewpsizliki ministirliqi 2-öktebir xitayning ürümchi bagangdiki “Shinjang 1-awghust polat-tömür shirkiti” bilen xitayning jyangshi ölkisidiki “Changjow gu'angxuy yémeklik tétitquliri shirkiti” ni “Uyghur mejburiy emgikining aldini élish qanuni” boyiche qara tizimlikke kirgüzgen. Buning bilen amérika ana weten xewpsizliki ministirliqining Uyghur mejburiy emgiki sewebidin cheklishige uchrighan xitay shirketlirining sani 75 ke yétip barghan. Xewerlerde, bu amérikaning tunji qétim Uyghur mejburiy emgikini chekleshni xitayning polat tömür sahesige, shundaqla Uyghur élide ishlepchiqirilghan mehsulatlarni matériyal menbesi qilghan shirketlerge kéngeytishi, dep qaralmaqta. Amérika ana weten xewpsizliki ministirliqining qeyt qilishiche, xitayning eng chong polat-tömür ishlepchiqirish karxanisi bolghan bawwu guruhigha qarashliq “Shinjang 1-awghust polat tömür shirkiti” xitayning dölet hamiliqidiki emgek küchlirini yötkesh pirogrammisigha izchil hem aktip qatniship, Uyghur we qirghiz emgek küchlirini ishletken.

Bu yil 8-ayda, amérika ana weten xewpsizliki ministirliqi xitayning “Shinjang xaba ashlé mis shirkiti” ni öz ichige alghan besh karxanisini qara tizimlikke alghandimu, “Amérika islamiy munasiwetler kéngeshi” bu qararni qarshi alghanidi.