Amérika meblegh bashqurush shirketliri barghanséri xitayni meblegh sélishqa bolmaydighan dölet dep qarimaqta

Amérikidiki “Töpilik” (THE Hill) gézitining 19-mart künidiki maqalisige asaslan'ghanda, wal kochisidiki (wal-sitrit) meblegh bashqurush shirketliri barghanséri xitayni meblegh sélishqa bolmaydighan dölet qaraydighanliqini ilgiri sürgen.

Mezkur xewerde déyilishiche, wal kochisidiki meblegh bashqurush shirketliri shi jinping rehberlikidiki kompartiyening maw zédung dewridikige oxshash bir ademningla aghzigha qaraydighan mustebit hakimiyet dewrige qaytip kelgenliki üchün bu qarargha kelgen.

Meblegh salghuchilar xitayning pay bazirining saghlamliqigha, téximu keng menidin éytqanda, xitaydiki xususiy shirketlerning uzun muddet mewjut bolup turushigha guman bilen qaraydiken.

Xongkong uniwérsitétidiki chén jiwu “Pul-mu'amile waqit géziti” ge mundaq dégen: “Xitayda héchqandaq chong shirket xojayinigha kengchilik qilinmaydu. Shi jinping ularning mutleq ita'et qilishni telep qilidu. Bu, zamaniwi pul-mu'amile sistémisi bilen sighishalmaydu. Xitaydiki kommunizm bilen zamaniwiliq bir-birige arilashmasliqi kérek” .

Meblegh salghuchilarning xitay baziridin meblegh chékindürüshi ejeblinerlik emes iken. “Bilumbérg” torining xewirige qarighanda, chet'ellik meblegh salghuchilarning xitaydiki meblighining pay qimmiti 2023-yilimu töwenligen.

Yéqinda amérika soda ministiri jina raymondo (Gina Raymondo) amérika shirketlirining hazir xitayni meblegh salghili bolmaydighan döletke aylinip qaldi dep qaraydighanliqini, chünki xitay hökümitining chet el shirketlirige toxtimay jerimane qoyidighanliqi, tosattin bésip kirip bixeterlik tekshürüshi qilidighanliqini, shunga bu shirketler purset izdep bashqa döletlerge, bashqa jaylargha yüzliniwatqanliqini bildürgenidi.