Awstraliye xitayning tehditige qarshi bashqurulidighan bomba ishlepchiqirishini köpeytmekchi bolghan

Xitay tinch okyanda qit'eler ara zerbe béridighan bashqurulidighan bombini sinaq qilip qoyup bergendin kéyin, awstraliye bashqurulidighan bomba mudapi'esini kücheytish bilen birge, yiraq musapilik zerbe béreleydighan bombilarni köplep ishlepchiqarmaqchi bolghan.

“El-jezire” qanili 30-öktebir élan qilghan bu xewerge köre, xitay tinch okyanda qit'eler ara bashqurulidighan bomba (ICBM) ni sinaq qilip qoyup bergen. Bu weqe qoshna döletlerde ghayet zor endishe peyda qilghan bolup, buningdin kéyin tinch okyanning “Bashqurulidighan bomba dewri” ge kiridighanliqidin signal bergen.

Awstraliye dölet mudapi'e sana'iti ministiri pet konroy (Pat Conroy) 30-öktebir bu heqte söz qilip, awstraliyening bashqurulidighan bombidin mudapi'e körüsh hem zerbe bérish iqtidarini kücheytidighanliqini, bu jehette amérika, yaponiye, jenubiy koréye qatarliq ittipaqdashliri bilen zich hemkarlishidighanliqini bildürgen. U mundaq dégen: “Biz némishqa téximu köp bashqurulidighan bombigha mohtaj? chünki amérika bilen xitay otturisidiki istratégiyelik riqabet awstraliyening xewpsizlikige biwasite tesir körsitidu. Bu riqabet bizning rayonimizda, yeni hindi-tinch okyan rayonida eng shiddetlik bolidu” dégen.

Uning bildürüshiche, xitayning qit'eler ara bashqurulidighan bombisining uchush ariliqi 11 ming kilométirgha yétidighan bolup, awstraliyening shimali déngiz tewelikige chüsheleydiken. Shunga awstraliye bashqurulidighan bombidin mudapi'e körüsh üchün, déngiz armiyesige SM-6 tipliq bashqurulidighan bomba orunlashturidiken. Shundaqla amérika bilen birliship, yadroluq su asti kémisini tereqqiy qilduridiken.