Italiye diniy erkinlik tori, katolik bishopining Uyghur élidiki “Wetenperwerlik terbiyesi” sayahitini tenqid qilghan

Bu yil 8-ayda fujyenning katolik diniy bishopi jen silu(Zhan Silu) xitay da'irilirining orunlashturushi boyiche fujyen katolik muritliridin “Wetenperwerlik terbiyesi” sayahet ömiki teshkillep, Uyghur élida ziyarette bolghan. Ziyarette jen silu amérika hökümiti we gherb parlaméntliri teripidin “Irqiy qirghinchiliq” dep békitilgen xitayning Uyghur élidiki siyasitini medhiyeligen. Xitay taratqulirining xewerliride, bu ziyaret “Shi jinpingning yéngi dewrdiki xitayche sotsiyalizm idiyesi” ni öginish we emeliyitini körüshning bir parchisi ikenliki, ziyarette jen siluning “Shinjang xitayning ayrilmas bir parchisi”, bu rayondiki milletler “Jungxu'a millitining qandashliq béghi bilen baghlan'ghan a'ile ezaliri” dégenliki tekitlen'genidi.

Halbuki, italiyediki “Zimistan” namliq diniy erkinlik tori 6-séntebir maqale élan qilip, bu ziyaret xitaydiki dölet étirap qilin'ghan besh resmiy dinning diniy xadimlirining “Wetenperwerlik terbiyesi” pa'aliyitining bir qismi süpitide Uyghur élidek “Müshkül” rayonlarni öz ichige alghan jaylarda, qandaq teshwiqat agéntlirining rolini oynawatqanliqini körsitip bergenlikini bildürgen. “Zimistan” torining qeyt qilishiche, xitay hökümiti ilgiri jen siluni fujyendiki katolik chérkawining bishopliqigha teyinligende watikan uzun mezgil jen siluni katolik dunyasidin qoghlap chiqarghan bolsimu, emma bu qétimqi ipadisi uning “Siyasiy xahishida héchqandaq özgirish bolmighanliqi” ni körsetken.

Xitaydiki katolik chérkawlirining bishoplirini teyinlesh mesilisi watikan bilen xitay otturisida izchil ixtilap peyda qilip kelgen. Xitay hökümiti bishoplarni teyinleshni xitayning igilik hoquqi, dégende ching tursa, watikan hezriti eysaning warislirining izbasarini békitish hoquqining watikanda ikenlikini qeyt qilip kelgen. “Zimistan” ning bildürüshiche, watikan xitay hökümitining 2000-yili jen siluni katolik bishopliqigha teyinlishini eyni waqitta étirap qilmighan bolsimu, emma ikki terepning 2018-yili hasil qilghan kélishimidin kéyin, rim papasi franshis jen siluning bishopliq ornini étirap qilghan, emma bu bishop jen siluning “Siyasiy xahishini özgertelmigen.”