Америка дөләт мәҗлиси хитай һәққидики йеңи тәләпләргә дуч кәлди

Мухбиримиз әзиз
2023.01.10

Хитай һөкүмити йеқинқи мәзгилләрдә америка үчүн әң асаслиқ тәһдит, дәп қариливатқан болуп, бу хил пикир еқимини һимайә қилғучилар 2023-йили йеңидин тәшкилләнгән америка дөләт мәҗлисидә хитай һәққидики йеңи тәләпләрни оттуриға қоюшқа башлиди.

Хитайниң иқтисад, һәрбий вә истратегийә мәсилилири бойичә тәһдиткә айлиниватқанлиқи, йәнә келип уларниң дуня тәминләш зәнҗирини контрол қилиш арқилиқ дуняни контрол қилишқа урунуватқанлиқи америка һөкүмәт системисидики көп қисим сиясийонларни әндишигә селип келиватқаниди. 10-январ күни бир қисим җумһурийәтчиләр америка авам палатасиниң рәиси кевин маккартий (Kevin McCarthy) тәсис қилишқа вәдә бәргән хитай һәққидики комитет һәмдә бу комитет арқилиқ йолға қоюлмақчи болған америка-хитай оттурисидики истратегийәлик риқабәт мәсилилири һәққидики соаллирини оттуриға қойди.

“фокус хәвәрлири” ниң 10-январдики хәвиридә ейтилишичә, йеңидин қурулуш алдидики бу комитетниң нишани “хитай коммунистик партийәсиниң иқтисад, технологийә вә бихәтәрлик мәсилилири бойичә немиләрни қиливатқанлиқини тәптиш қилип туруш, шуниңдәк бу һәқтә қәрәллик йосунда америка һөкүмитигә сиясий тәклипләрни йоллап туруш” болидикән. Шуниң билән биргә мәзкур комитет сиясий тәклипни 2023-йилиниң ахири америка дөләт мәҗлисигә тапшуруп болуши, 2024-йилиниң ахири бу һәқтики толуқ доклатни елан қилиши шәрт икән.

Хәвәрдә ейтилишичә, көплигән җумһурийәтчиләр нөвәттә хитайни америка үчүн дөләт бихәтәрликигә хәвп пәйда қилғучи асасий күч, дәп қарашқа башлиған. Америка авам палатасиниң рәиси кевин маккартий буниңдин бирнәччә күн илгирики вәзипә қобул қилиш йиғинида хитайға диққәтни мәркәзләштүрүшниң америка тәвәсидики ишчилар қошуниға йеңи пурсәтләрни ата қилидиғанлиқини алаһидә тәкитлигән. У бу һәқтә тохтилип: “хитай компартийәси үчүн биз икки партийәдикиләрниң һәмкарлиқи асасида бир комитет тәсис қилимиз һәмдә қандақ қилип миңлиған хизмәт пурсәтлирини хитайдин америка тәвәсигә көчүрүп келишниң йолини қилимиз” дәп алаһидә көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.