Xitayning xotendiki herbiy ayrodurumi hindistan üchün jiddiy tehdit bolmaqta

Xitay-hindistan chégra mudapi'e qisimlirining galwan jilghisidiki toqunushidin töt kün ötkende ikki dölet munasiwitidiki jiddiylik pesiyip qalghandek körünsimu, emma körünüshtiki bu tinchliqta ikki dölet yenila bir xil bi'aramchiliqta turmaqta iken.

Hindistan “Tunji pochta” gézitining xewer qilishiche, nöwette tibet we Uyghur élining hindistan bilen bolghan emili chégra kontrol liniyeside xitay hökümitining herbiy ul esliheler qurulushini kücheytishi, bolupmu uning xoten we tibettiki shigatsé ayrodurumlirigha J-20 tipliq 5-ewlad urush ayropilanlirini orunlashturushi hindistanni endishige salmaqta iken. Xewerlerde, xoten hawa armiye bazisining qadaqtiki pan'gongsu kölining shimaligha 350 kilométir, uning hindistan igilik hoquq dewasi qiliwatqan aqsaychin chégra liniyesige peqet 150 kilométir kélidighanliqi qeyt qilinmaqta.

Halbuki, “Tunji pochta” gézitining bildürüshiche, tibettiki shigatsé hawa armiye bazisi hindistanning xasimaradiki rafalé hawa armiye bazisigha 300 kilométir, sikkim emili chégra kontrol liniyesige peqet 150 kilométir kélidiken. Xitayning Uyghur ilidiki xoten ayrodurumi 1957-yili yasalghan bolup, eyni waqitta xitay yene ladaq chégrasidiki aqsaychin tash yolinimu yasighan.

“Tunji pochta” gézitining bildürüshiche, xoten ayrodurumi herbiy we xelq awiyatsiye ishlirida teng qollinidighan qosh meqsetlik ayrodurum bolup, bu ayrodurum xitayning ladaq rayonidiki herbiy heriketliride halqiliq rol oynaydiken. Nöwette, xoten ayrodurumining her ikki uchush yoli aktip meshghulatta bolup, bu ayrodurumda yene nurghun herbiy esliheler we ayropilan toxtitish orunliri qurulghan. “Tunji pochta” gézitining bildürüshiche, hindistan xitayning bu rayonlardiki herbiy tereqqiyatigha taqabil turmaqchi bolsa özining chégradiki yéngi ewlad urush ayropilanlirini köpeytishi, shundaqla sün'iy hemrah we razwédka ayropilanlirining bu közitish we istixbarat toplash iqtidarini jiddiy kücheytishi kérek iken.