Awstraliye bilen hindistan xitay tehditige qarshi zamaniwi herbiy qorallarni sétiwalmaqchi iken

Muxbirimiz jewlan
2023.03.17

Xitay re'isi shi jinping yéqinda xitay armiyesini “Polat istihkam” qilip qurup chiqidighanliqini jakarlap, herbiy hazirliqlarni téximu kücheytidighanliqi heqqide shepe berdi. Etraptiki döletler xitayning barghanséri küchiyiwatqan herbiy tehditini xéli burunla eyiblep kéliwatqan bolup, bezi döletler buninggha qarshi tedbir élishqa bashlighan.

“Amérika birleshme agéntliqi” ning 16-mart künidiki xewirige qarighanda, awstraliye amérikadin 220 dane “Urush paltisi” namliq bashqurulidighan bomba sétiwalmaqchi bolghan, amérika tashqi ishlar ministirliki buni testiqlighan. Awstraliye terepning bildürüshiche, yéngi tiptiki yadroluq su asti kémisi bu bashqurulidighan bombilarni qoyup béreleydiken.

Yaponiyemu aldinqi ayda xitay tehditige qarshi armiyesini kücheytidighanliqi, amérikadin 400 dane “Urush paltisi” namliq bashqurulidighan bomba sétiwélip, 2026-yilghiche ularni herbiy nuqtilargha orunlashturidighanliqini jakarlighaniken.

3-Ayning 16-küni, “Roytérs agéntliqi” ning xewer qilishiche, hindistan öz armiyesini téximu kücheytish üchün 8 milyard 500 milyon dollarliq herbiy eslihe we qoral-yaraq sétiwalmaqchi bolghan, buning ichide rakétaliq bomba, tik uchar ayropilan, top-zembirek, urushqa kéreklik éléktronluq sistéma qatarliqlar bar iken.

Hindistanning bundaq qilishidiki seweb yenila xitay bolup, hindistan hazir özini xitay bilen pakistanning qorshawigha chüshüp qalghandek hés qilghan؛ yene kélip, hindistan bilen xitay himalaya taghlirini boylighan chégra rayonlirida izchil sürkiliship yaki toqunushup kelmektiken. Hindistan sowét dewridin qalghan herbiy eslihelirini zamaniwilashturush arqiliq xitaygha taqabil turushning zörürlükini tonup yetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.