Исраилийә тәрәп “хамас” билән болған урушни тохтитамду?

Пәләстиндики асаслиқ сиясий партийәләрдин “хамас” вә “фатах” ни өз ичигә алған 14 гуруһ бейҗиңдики икки күнлүк сөһбәттә хитай һөкүмитиниң келиштүрмичилик қилиши билән, 22-июл күни “пәләстин азадлиқ тәшкилати” ниң рәһбәрлики астида ортақ иш көрүшкә келишкән.

24-Июл күни америка пайтәхти вашингтонға зиярәткә кәлгән исраилийә баш министири бенҗамин нетанияху (Netanyahu Benjamin) америка дөләт мәҗлисидә нутуқ сөзләп. “биз ‛хамас‚ билән болған урушта толуқ ғәлибини қолға кәлтүрмигичә болди қилмаймиз” дәп көрсәткән.

Бирләшмә агентлиқниң 24-июлдики хәвиридә ейтилишичә, нетанияхуниң бу қетимлиқ зияритидә “хамас” қа қарши урушта америка һөкүмитиниң қоллишини қолға кәлтүрүш әң муһим нишан һесаблинидикән. Йәнә келип тоққуз айдин буян давам қиливатқан урушни тохтитиш мәқситидә йеқин кәлгүсидә оттуриға чиқиш еһтимали болған һәрқандақ сөһбәтни қоллайдиғанлиқини билдүргән нетанияхуниң бундақ сөзни қилиши һәр саһәни бәкму һәйран қалдурған. Хәвәрдә ейтилишичә, “хамас” қа қарши урушта аз дегәндиму пәләстин тәрәптин 39 миңдин көпрәк киши һаятидин айрилған.

Хәвәрдә ейтилишичә, нетанияху “әгәр ‛хамас‚ тәслим болса, қораллирини толуқ тапшурса һәмдә барлиқ тутқунларни шәртсиз қоюп бәрсә, уруш тохтитишни сөзлишишкә болиду” дегән. Әмма исраилийәниң “хамас” қа қарши уруши таки уларниң һәрбий иқтидарини толуқ вәйран қилип барлиқ тутқунларни исраилийәгә қайтуруп кәлгүчә давам қилидиғанлиқини әскәрткән. Шуңа тәнқидчиләр бирдәк, “нетанияхуниң ‛толуқ ғәлибә‚ һәққидики бу хил сөзлири реаллиққа қилчиму уйғун әмәс” дәп көрсәткән.