Isra'iliye terep “Xamas” bilen bolghan urushni toxtitamdu?

Pelestindiki asasliq siyasiy partiyelerdin “Xamas” we “Fatax” ni öz ichige alghan 14 guruh béyjingdiki ikki künlük söhbette xitay hökümitining kélishtürmichilik qilishi bilen, 22-iyul küni “Pelestin azadliq teshkilati” ning rehberliki astida ortaq ish körüshke kélishken.

24-Iyul küni amérika paytexti washin'gton'gha ziyaretke kelgen isra'iliye bash ministiri bénjamin nétaniyaxu (Netanyahu Benjamin) amérika dölet mejliside nutuq sözlep. “Biz ‛xamas‚ bilen bolghan urushta toluq ghelibini qolgha keltürmigiche boldi qilmaymiz” dep körsetken.

Birleshme agéntliqning 24-iyuldiki xewiride éytilishiche, nétaniyaxuning bu qétimliq ziyaritide “Xamas” qa qarshi urushta amérika hökümitining qollishini qolgha keltürüsh eng muhim nishan hésablinidiken. Yene kélip toqquz aydin buyan dawam qiliwatqan urushni toxtitish meqsitide yéqin kelgüside otturigha chiqish éhtimali bolghan herqandaq söhbetni qollaydighanliqini bildürgen nétaniyaxuning bundaq sözni qilishi her saheni bekmu heyran qaldurghan. Xewerde éytilishiche, “Xamas” qa qarshi urushta az dégendimu pelestin tereptin 39 mingdin köprek kishi hayatidin ayrilghan.

Xewerde éytilishiche, nétaniyaxu “Eger ‛xamas‚ teslim bolsa, qorallirini toluq tapshursa hemde barliq tutqunlarni shertsiz qoyup berse, urush toxtitishni sözlishishke bolidu” dégen. Emma isra'iliyening “Xamas” qa qarshi urushi taki ularning herbiy iqtidarini toluq weyran qilip barliq tutqunlarni isra'iliyege qayturup kelgüche dawam qilidighanliqini eskertken. Shunga tenqidchiler birdek, “Nétaniyaxuning ‛toluq ghelibe‚ heqqidiki bu xil sözliri ré'alliqqa qilchimu uyghun emes” dep körsetken.