Ma shingruy Uyghur élidiki iqtisadiy échiwétish sinaq rayonliri we sana'et baghchilirining tereqqiyatini kücheytishni tekitligen

Uyghur aptonom rayonluq partkom 3-noyabir küni “Sherqiy jungghar iqtisadiy échiwétish rayoni” da yighin chaqirip, kishilik hoquq teshkilatliri teripidin Uyghur mejburiy emgikining asasliq bazisi, dep qariliwatqan rayondiki “Sana'et baghchiliri”, shundaqla iqtisadiy échiwétish sinaq rayonlirining yuqiri süpetlik tereqqiyatini kücheytish, bu sana'et baghchiliri we iqtisadiy sinaq rayonlirini “Bir “Belbagh we bir yol” karidoridiki döletler bilen téximu zich bashlashni telep qilghan. Bu yighinning xitay iqtisadi kasatliship, xitay hökümiti iqtisadni qutquzushning jiddiy tedbirlirini alghan bolsimu, emma buning ünümige guman bilen qariliwatqan bir peytte, échilishi diqqet qozghimaqta. Ma shingruyning yighinda körsitishiche, Uyghur élidiki iqtisadiy échiwétish sinaq nuqtilirigha we sana'et baghchilirigha xitayning “Énérgiye éhtiyajigha kapaletlik qilish, istratégiyelik kan bayliqi we ashliq bixeterliki istratégiyesi nuqtisidin qarash kérek” iken.

Xitayning Uyghur élidiki sana'et baghchilirining kölimi, uning 2017-yilidin bashlap Uyghurlarni keng kölemde tutqun qilip, lagér-türmilerge qamishi bilen teng téz kéngiyip, nurghun Uyghurlar bu orunlardiki mejburiy emgek küchlirige aylandurulghan. Nöwette, xitayning iqtisadiy sinaq rayonliri we sana'et baghchilirini téximu kücheytishi, Uyghur emgek küchlirining téximu uzun waqit bu orunlargha bend qilinishi, mejburiy emgekning téximu kölemlishishi hem sistémilishishini keltürüp chiqirishidin endishe qilinmaqta. “Shinjang géziti” ning xewer qilishiche, yighinda ma shingruy mundaq dégen: “Biz shinjangdiki échiwétish rayoni we sana'et baghchilirining xizmitini yaxshi ishleshte, shinjanggha shinjangda turup qarimasliqimiz, sana'et baghchilirigha noqul sana'et baghchisi, dep qarimasliqimiz, buningda partiye we döletning omumi weziyitini chiqish qilishimiz, buninggha döletning énérgiye éhtiyajigha kapaletlik qilish, istratégiyelik kan bayliqi we ashliq bixeterlik istratégiyesi nuqtisidin qarishimiz kérek.”

Uning körsitishiche, her qaysi orunlar “Erkin soda rayonlirini yuqiri ölchem bilen qurup, échiwétish rayoni we sana'et baghchilirining etraptiki döletler bilen chongqur hemkarliqini kücheytishi, xelq'ara hemkarliqning yéngi shekilliri heqqide izdinishi kérek” iken.