Marko rubyo wezipige teyinlesh guwahliq yighinida Uyghurlar mesilisini tilgha aldi

Amérika tashqi ishlar ministirliqining ministir namzati, kéngesh palata ezasi marko rubiyo 15-yanwar chüshtin burun ötküzülgen wezipige teyinlesh guwahliq yighinida Uyghurlar mesilisi heqqidiki so'allargha jawab bérip, özlirining Uyghurlar mesilisidiki meydanining özgermeydighanliqini bildürdi.

Guwahliq yighinida tashqi ishlar ministiri namzati kéngesh palata ezalirining so'allirigha jawab bérish arqiliq özining layaqetlik namzat ikenlikini ispatlaydighan bolup, shu qatardiki so'allarning birini kéngesh palata ezasi jéf mérkéliy (Jeff Merkley) soridi. U marko rubiyoning Uyghur élidiki mejburiy emgekke qarshi turush mesiliside wujudqa chiqarghan netijilirini alahide mu'eyyenleshtürdi. Arqidinla nöwette tayland türmiside tutup turuluwatqan Uyghurlar mesiliside amérika hökümitining qandaq pozitsiyede ikenlikini sorighanda marko rubiyo éniq qilip: “Biz dawamliq tayland hökümitige bu Uyghurlarni xitaygha qayturuwetmeslik heqqide bésim ishlitimiz” dédi. Shundaqla Uyghur élidiki mejburiy emgek mesilisi heqqide toxtilip, “Xitay hökümitining Uyghurlarni zamaniwi qullar lagérigha qamishini keskin eyibleymiz” dédi.

Guwahliq yighinida soralghan keskin so'allarning biri xitay mesilisi bolup, marko rubiyo xitayni “Dölitimiz ta hazirgha qeder duch kélip baqmighan xeterlik we yoshurun bolghan düshmen derijisidiki dölet” dédi. U ötken musapilerni qisqiche eslep ötkendin kéyin amérika hökümitining xitaygha “Tereqqiy qiliwatqan dölet” derijiside mu'amile qilip kelgenliki, shuningdek ularning soda sahesidiki aldamchiliq qilmishlirigha köz yumghanliqini tilgha élip: “Eger biz xitay heqqidiki hazirqi meydanimizni yenila özgertmisek 10 yilgha barmayla hayatimizdiki hemmila nerside xitayning qoligha qaraydighan bolup qalimiz” dédi.

Guwahliq yighinidin kéyinki muhim qedem bu heqte awaz bérish bolup, nawada awaz bérish utuqluq bolsa bu yil 53 yashqa kirgen marko rubiyo latin-amérikaliqlar ewladidin tunji bolup amérika tashqi ishlar ministiri bolghan kishi bolup qalidiken.