Мәҗбурий әмгәккә четишлиқ шейин(Shein) ширкити ишчиларни һәптидә 75 саәт ишлитидикән

Вашингтондин мухбиримиз җәвлан тәйярлиди
2024.05.17

Йиллардин буян уйғур районидики мәҗбурий әмгәккә четишлиқи барлиқи хәвәр қилинип келиватқан шейин ширкити чоң чәклимигә учримастин давамлиқ пайда тепип, бүгүнки күндә пай чекини америкада базарға селишқа тәйярлиниватқан чоң ширкәткә айланған.

Америкадики даңлиқ иқтисад хәвәрлири қанили (CNBC) ниң 15-май күни хәвәр қилишичә, хитайниң топ вә парчә кийим сетиш ширкити шейин америкада пай чекини базарға салмақчи болған. Қисқиғинә бир нәччә йилда ғайәт зор пайдиға еришкән бу ширкәтниң америкадинла тапқан пайдиси наһайити көп болған; бу ширкәткә мал тәминлигүчи завутлар ишчиларни һәптисигә 75 саәт ишлитидикән, ишчилар һәптидә аран бир күн яки униңдинму аз дәм алидикән.

Хәвәрдә ейтилишичә, шейин ширкити пай чекини базарға селиш үчүн, ишчиларни әмгәк саити өлчими бойичә ишлитидиғанлиқиға вәдә бәргән болсиму, йеқинқи тәкшүрүштә ениқланған әһвалға асасланғанда, бир қисим кийим-кечәк завутлири ишчиларни нормидин артуқ ишләткән. Әслидә 2021-йилила шивейтсарийәдики “омумий назарәт” (Public Eye) тәшкилати гуаңҗудики завут ишчилириниң исмена қошуп ишләйдиғанлиқи вә әмгәк муһитиниң интайин начар икәнликини тәкшүрүп чиққан болуп, йеқинқи тәкшүрүшләрдә бу әһвалниң һелиһәм давам қиливатқанлиқи мәлум болған.

2022-Йилниң ахирида, америкадики нопузлуқ таратқулардин бири болған “блумберг гезити” шейин ширкитиниң тор бетидә сетиливатқан кийим-кечәкләрниң “шинҗаң пахтиси” билән ишләпчиқирилғанлиқини, американиң “шинҗаң пахтиси” ға қойған чәклимисигә қаримай, уларниң америкада қиливатқан содисиниң қиммити нәччә милярд долларға йетидиғанлиқини хәвәр қилғаниди.

Мәлум болушичә, шейин ширкити тор бетидин кийим-кечәк заказ қилғанда, бир қетимда 800 доллардин ешип кәтмәслик чәклимиси қойидикән. Шуниң билән, уйғур елидин чиққан пахта билән ишләнгән кийим-кечәкләр һеч тосалғусизла америкадики истемалчиларға йетип баралайдикән.

(CNBC) Ниң хәвиридә көрситилишичә, америка дөләт мәҗлиси америка-хитай риқабити алаһидә комитети нөвәттә шейин билән хитай һөкүмитиниң қандақ бағлиниши барлиқини, тик токта мал сатқан бу ширкәтниң абонтларниң санлиқ мәлумат учурини оғрилаш қилмишиниң бар-йоқлуқини тәкшүрүшни буйруған. Америка дөләт мәҗлиси әзалири йәнә шейинниң пай чекини америкада базарға селишқа иҗазәт бериш үчүн, америка аксийә базири комитетиниң алди билән шейинниң мәҗбурий әмгәккә четишлиқ мәсилисини толуқ тәкшүрүп чиқиши керәкликини оттуриға қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.