Mejburiy emgekke chétishliq shéyin(Shein) shirkiti ishchilarni heptide 75 sa'et ishlitidiken

Washin'gtondin muxbirimiz jewlan teyyarlidi
2024.05.17

Yillardin buyan Uyghur rayonidiki mejburiy emgekke chétishliqi barliqi xewer qilinip kéliwatqan shéyin shirkiti chong cheklimige uchrimastin dawamliq payda tépip, bügünki künde pay chékini amérikada bazargha sélishqa teyyarliniwatqan chong shirketke aylan'ghan.

Amérikadiki dangliq iqtisad xewerliri qanili (CNBC) ning 15-may küni xewer qilishiche, xitayning top we parche kiyim sétish shirkiti shéyin amérikada pay chékini bazargha salmaqchi bolghan. Qisqighine bir nechche yilda ghayet zor paydigha érishken bu shirketning amérikadinla tapqan paydisi nahayiti köp bolghan؛ bu shirketke mal teminligüchi zawutlar ishchilarni heptisige 75 sa'et ishlitidiken, ishchilar heptide aran bir kün yaki uningdinmu az dem alidiken.

Xewerde éytilishiche, shéyin shirkiti pay chékini bazargha sélish üchün, ishchilarni emgek sa'iti ölchimi boyiche ishlitidighanliqigha wede bergen bolsimu, yéqinqi tekshürüshte éniqlan'ghan ehwalgha asaslan'ghanda, bir qisim kiyim-kéchek zawutliri ishchilarni normidin artuq ishletken. Eslide 2021-yilila shiwéytsariyediki “Omumiy nazaret” (Public Eye) teshkilati gu'angjudiki zawut ishchilirining isména qoshup ishleydighanliqi we emgek muhitining intayin nachar ikenlikini tekshürüp chiqqan bolup, yéqinqi tekshürüshlerde bu ehwalning hélihem dawam qiliwatqanliqi melum bolghan.

2022-Yilning axirida, amérikadiki nopuzluq taratqulardin biri bolghan “Blumbérg géziti” shéyin shirkitining tor bétide sétiliwatqan kiyim-kécheklerning “Shinjang paxtisi” bilen ishlepchiqirilghanliqini, amérikaning “Shinjang paxtisi” gha qoyghan cheklimisige qarimay, ularning amérikada qiliwatqan sodisining qimmiti nechche milyard dollargha yétidighanliqini xewer qilghanidi.

Melum bolushiche, shéyin shirkiti tor bétidin kiyim-kéchek zakaz qilghanda, bir qétimda 800 dollardin éship ketmeslik cheklimisi qoyidiken. Shuning bilen, Uyghur élidin chiqqan paxta bilen ishlen'gen kiyim-kéchekler héch tosalghusizla amérikadiki istémalchilargha yétip baralaydiken.

(CNBC) Ning xewiride körsitilishiche, amérika dölet mejlisi amérika-xitay riqabiti alahide komitéti nöwette shéyin bilen xitay hökümitining qandaq baghlinishi barliqini, tik tokta mal satqan bu shirketning abontlarning sanliq melumat uchurini oghrilash qilmishining bar-yoqluqini tekshürüshni buyrughan. Amérika dölet mejlisi ezaliri yene shéyinning pay chékini amérikada bazargha sélishqa ijazet bérish üchün, amérika aksiye baziri komitétining aldi bilen shéyinning mejburiy emgekke chétishliq mesilisini toluq tekshürüp chiqishi kéreklikini otturigha qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.