Amérikadiki bir teshkilat xitayning rongchéng déngiz mehsulatliri shirkitini qara tizimlikke kirgüzüshni telep qilghan
2025.01.03
Amérikadiki “Jenub rak mehsulati birleshmisi” (The Southern Shrimp Alliance) namliq déngiz mehsulatliri teshkilati Uyghur mejburiy emgiki sewebidin xitayning rongchéng senyö yémeklik shirkitini amérika “Uyghur mejburiy emgikining aldini élish qanuni” ning cheklesh tizimlikige kirgüzüshni telep qilghan.
Melum bolushiche, eger amérika hökümiti bu telepni orunluq, dep qarisa, mezkur xitay shirkitining mehsulatlirining amérika bazirigha kirishi cheklinidiken. Buning aldida, amérika ana weten xewpsizliki ministirliqi xitay déngiz mehsulatlirini “Uyghur mejburiy emgikining aldini élish qanuni” boyiche közitilidighan nuqtiliq saheler qatarigha kirgüzgenidi. “Jenub rak mehsulati birleshmisi” 3-yanwar amérika ana weten xewpsizliki ministirliqining yardemchi ministiri robért sélwérsqa ewetken mektupida, rongchéng senyö yémeklik shirkitining argéntina qizil rak mehsulatini shendungda pishshiqlap ishlep amérika bazirigha éksport qiliwatqanliqi, bu shirket amérika fédératsiye dora we yémeklik idarisining tekshürüsh telipini qilghanliqini bildürgen.
Mektupta qeyt qilinishiche, sanliq melumatlar rongchéng senyö yémeklik shirkitining tekshürüshini ret qilghandin kéyinmu, amérikaning séyatil portigha üch konténér argéntina qizil rak mehsulatini kirgüzgenliki, bu mehsulatlarni sétiwalghuchi shirketning shendungda Uyghur mejburiy emgek küchlirini ishlitiwatqan üch déngiz mehsulati shirkitige baghlinishliq ikenlikini körsetmekte iken.Mektupta, “Qanunsiz okyan qurulushi” teshkilatining ilgiri élan qilghan bu heqtiki doklatida, shendungdiki bu üch xitay déngiz mehsulati shirkitining Uyghur mejburiy emgek küchlirini ishlitidighanliqini ashkarilighanliqi bildürülgen.
Amérika ana weten xewpsizliki ministirliqi ilgiri shendung rijaw méyjya déngiz mehsulatliri guruhini xitayning dölet hamiyliqidiki Uyghur emgek küchlirini yötkep ishlitish pirogrammisigha qatnishishi sewebidin qara tizimlikke kirgüzgenidi. Uyghur élidiki yerlik taratqularning xewerliridin, bu shirketning Uyghur emgek küchlirini shendungdiki zawutigha yötkepla qalmay, uning yene mekit nahiyesidimu béliqchiliq férmisi échip, su mehsulatlirini yétishtürüwatqanliqi melum bolghanidi.