Xitay, rusiye we iran sün'iy eqil téxnikisidin paydilinip amérika saylimigha tesir körsetmekchi iken

Amérika ana weten xewpsizlik ministirliqi 3-öktebir küni yilliq bixeterlik bahalash doklati élan qilip, xitay, rusiye, we iranning bu yil 5-noyabir küni ötküzülidighan amérika  pirézidént saylimigha tesir körsitish xewpining küchiyiwatqanliqini agahlandurghan. Doklatta qeyt qilinishiche, bu döletler amérika saylimigha tesir körsitishte sün'iy eqil téxnikisidin paydilinip, saxta we bölgünchi uchurlarni tarqitishni öz ichige alghan wasitilerni qollinidiken. Doklatta, xitay, rusiye we iranning “Aghdurmichiliq wasitiliri, ashkara bolmighan jinayi we zorlash taktikilirini  qollinip, amérikaning démokratik apparatlirigha we dölet ichidiki ijtima'iy inaqliqqa bolghan ishenchisige buzghunchiliq qilish pursitini izdeydighanliqi” perez qilin'ghan.

Nöwette, amérikaning démokratlar partiyesi pirézidént namzati kalama xarris bilen jumhuriyetchiler partiyesi namzati, sabiq pirézidént donald tramp arisida keskin saylam riqabiti dawamlashmaqta. Bu weziyet saylighuchilar arisidiki bölünüshni téximu kücheytishi, chet el reqiblirining amérika démokratiye musapisige buzghunchiliq qilishi üchün purset yaritip bérishi mumkin dep qaralmaqta. Amérika ana weten xewpsizlik ministirliqining bu doklati bilen bir waqitta yene  amérikadiki “Grafika” axbarat analizi shirkiti 3-öktebir tetqiqat doklati élan qilip, xitayning ijtima'iy alaqe supilirigha tesir körsitish herikiti amérika saylighuchilirini nishan qiliwatqanliqi, ularning saylam harpisida amérika siyasiyonlirini chüshürüp, bölgünchilik peyda qilidighan uchurlarni tarqitiwatqanliqini bildürgen.