“тему” ширкити “шинҗаң пахтиси” ишләтмәслик сияситини өзгәрткән

Вашингтондин мухбиримиз әркин тәйярлиди
2024.04.15

Хитайдики даңлиқ тор сода суписи болған “тему” ширкити бир мәзгил мал тәминлигүчилиридин мәһсулатлириға уйғур мәҗбурий әмгикигә бағлинишлиқ “шинҗаң пахтиси” ишләтмәсликни тәләп қилип кәлгән иди. Йеқинда уларниң бу сиясәтни өзгәрткәнлики мәлум болмақта. Темуниң бу сиясәтни өзгәртиштә қандақ амилларни чиқиш қилғанлиқи мәлум әмәс, әмма америка дөләт мәҗлиси әзалири хитайниң мәзкур даңлиқ тор сода суписини тәминләш зәнҗиридики уйғур мәҗбурий әмгикини чәкләштә йетәрлик тәдбир алмаслиқта әйибләп кәлгән. “тему” ширкити америка дөләт мәҗлиси әзалириниң бесимида өзиниң тәминләш зәнҗиридики миңлиған кичик типлиқ ишләпчиқириш карханилириға қарита давамлиқ назарәтни күчәйтидиғанлиқини билдүргән. Лекин америкадики “учур” намлиқ сода ториниң ашкарилишичә, “тему” өткән йили қисқа мәзгил йолға қойған мал тәминлигүчилиридин “шинҗаң пахтиси” ишләтмәсликни тәләп қилиштин ваз кәчкән.

 Уйғур диярида ишләпчиқирилған “шинҗаң пахтиси” уйғур мәҗбурий әмгикигә зич бағлинишлиқ, дәп қарилип америка һөкүмити тәрипидин “шинҗаң пахтиси” да ишләпчиқирилған тоқумичилиқ вә кийим-кечәк мәһсулатлириниң америка базириға кириши чәкләнгән. Лекин “учур” ториниң билдүрүшичә, “тему” ни мал билән тәминлигүчи нурғун ширкәтләрниң мәсуллири темуниң мал тәминлигүчи ширкәтләрдин тәләп қилип кәлгән “мәһсулатлириға уйғур диярида ишләпчиқирилған һәрқандақ пахта мәһсулатини кийим-кечәк тоқумичилиқ мәһсулатлириға ишләтмәслик” һәққидики тәләптин ваз кәчкәнликини ейтқан.

 Темуни мал билән тәминлигүчиләрниң “учур” сода ториға билдүрүшичә, темуниң хадимлири һәтта бәзи әһвалларда мал тәминлигүчи ширкәтләрни башқа дөләтләрниң пахтисини ишләтмәй, давамлиқ “шинҗаң пахтиси” ишлитишкә риғбәтләндүргән. Хәвәрдә бу өзгириш һәққидә тохтилип “темуниң бу қарари американиң ‛уйғур мәҗбурий әмгикиниң алдини қануни‚ ға әмәл қилиш вәдисигә болған ишәнчини аҗизлаштуриду” дәп көрситилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.