“Tému” shirkiti “Shinjang paxtisi” ishletmeslik siyasitini özgertken

Washin'gtondin muxbirimiz erkin teyyarlidi
2024.04.15

Xitaydiki dangliq tor soda supisi bolghan “Tému” shirkiti bir mezgil mal teminligüchiliridin mehsulatlirigha Uyghur mejburiy emgikige baghlinishliq “Shinjang paxtisi” ishletmeslikni telep qilip kelgen idi. Yéqinda ularning bu siyasetni özgertkenliki melum bolmaqta. Témuning bu siyasetni özgertishte qandaq amillarni chiqish qilghanliqi melum emes, emma amérika dölet mejlisi ezaliri xitayning mezkur dangliq tor soda supisini teminlesh zenjiridiki Uyghur mejburiy emgikini chekleshte yéterlik tedbir almasliqta eyiblep kelgen. “Tému” shirkiti amérika dölet mejlisi ezalirining bésimida özining teminlesh zenjiridiki minglighan kichik tipliq ishlepchiqirish karxanilirigha qarita dawamliq nazaretni kücheytidighanliqini bildürgen. Lékin amérikadiki “Uchur” namliq soda torining ashkarilishiche, “Tému” ötken yili qisqa mezgil yolgha qoyghan mal teminligüchiliridin “Shinjang paxtisi” ishletmeslikni telep qilishtin waz kechken.

 Uyghur diyarida ishlepchiqirilghan “Shinjang paxtisi” Uyghur mejburiy emgikige zich baghlinishliq, dep qarilip amérika hökümiti teripidin “Shinjang paxtisi” da ishlepchiqirilghan toqumichiliq we kiyim-kéchek mehsulatlirining amérika bazirigha kirishi cheklen'gen. Lékin “Uchur” torining bildürüshiche, “Tému” ni mal bilen teminligüchi nurghun shirketlerning mes'ulliri témuning mal teminligüchi shirketlerdin telep qilip kelgen “Mehsulatlirigha Uyghur diyarida ishlepchiqirilghan herqandaq paxta mehsulatini kiyim-kéchek toqumichiliq mehsulatlirigha ishletmeslik” heqqidiki teleptin waz kechkenlikini éytqan.

 Témuni mal bilen teminligüchilerning “Uchur” soda torigha bildürüshiche, témuning xadimliri hetta bezi ehwallarda mal teminligüchi shirketlerni bashqa döletlerning paxtisini ishletmey, dawamliq “Shinjang paxtisi” ishlitishke righbetlendürgen. Xewerde bu özgirish heqqide toxtilip “Témuning bu qarari amérikaning ‛Uyghur mejburiy emgikining aldini qanuni‚ gha emel qilish wedisige bolghan ishenchini ajizlashturidu” dep körsitilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.