Xitaydin 200 ming dollar élish bilen eyiblen'gen b d t mutexessisi, Uyghur diyarigha qaritilghan émbargoni bikar qilishni telep qilghan

Washin'gtondin muxbirimiz erkin teyyarlidi
2024.05.20

B d t ning bélorusiyelik mutexessisi aléna doxan 17-may küni bayanat élan qilip, döletlerning xitaygha, bolupmu Uyghur diyarigha yürgüzgen émbargosini bikar qilishini otturigha qoyghan. 2022-Yili jenwede turushluq bir kishilik hoquq teshkilati teripidin xitayning 200 ming dollar pulini élish bilen eyiblen'gen aléna doxanning körsitishiche, döletler yene öz tewelikidiki shirket we soda orunlirining bu xil émbargo qararlirigha emel qilishini tosush üchün küchlük tedbirlerni élishi kérek iken. Aléna doxanning téxi yéqindila amérikaning xitayning Uyghur mejburiy emgikige chétishliq 26 shirkitini cheklesh tizimlikige kirgüzüshining arqisidinla bu bayanatta bolushi diqqet qozghimaqta. Melum bolushiche, aléna doxan yéqinda xitay hökümitining ruxsiti bilen xitayda, jümlidin Uyghur diyarida 12 künlük tekshürüshte bolghan. Xewerlerde, uning tekshürüsh doklatini bu yil 9-ayda b d t kishilik hoquq kéngishige sunidighanliqi qeyt qilinmaqta.

Aléna doxan 17-may küni élan qilghan bayanatida, “Xitayning bir tereplimilik émbargo tesiri hem émbargoni ijra  qilish wasitiliride alahide örnek” ikenlikini bildürüp:“Buningda shinjangning uchrighan tesiri alahide éghir, bu rayon'gha chétishliq soda we ishlepchiqirish zenjiri bilen alaqe qurushning birinchi yaki ikkinchi derijilik émbargogha uchrash endishisi, halqiliq soda hem ishlepchiqirish sahelirining bu rayon bilen bolghan alaqisige kashila qilmaqta” dégen. Halbuki, jenwede turushluq b d t ni közitish teshkilati 2022-yili 5-ayda élan qilghan bir bayanatta, aléna doxanning 2021-yili xitaydin 200 ming dollar söyünche élip, xitayning Uyghurlargha tutqan mu'amilisini aqlashqa kirishkenlikini bildürgen. Eyni waqitta mezkur teshkilat doxanning “Uyghurlargha qaritilghan étnik tazilashni aqlash üchün xitaydin alghan 200 ming dollarni qayturushi” ni telep qilghan. B d t ni közitish teshkilatining bildürüshiche, aléna doxan 2021-yili 9-ayda béyjingning sahibxaniliqida ötküzülgen “Shinjang yaxshi makan” namliq tor teshwiqat pa'aliyitigimu qatnashqaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.