“Uyghur siyasiti qanun layihesi” mutleq üstün awaz bilen maqullandi

Muxbirimiz eziz
2022.12.01
Share on WhatsApp
Share on WhatsApp
uyghur-siyasiti-qanun-layihesi-awaz.jfif Amérika dölet mejlisi awam palatasida maqullan'ghan “Uyghur siyasiti qanun layihesi” ning awaz netijisi, 2022-yili 1-dékabir, washin'gton.
c.span

Amérika dölet mejliside muzakire qiliniwatqan Uyghurlar heqqidiki qanun layihesidin “Uyghur siyasiti qanun layihesi” 1-dékabir küni chüshtin kéyin 17 ge qarshi 407 awaz bilen amérika awam palatasida mutleq yoquri awaz bilen maqullandi.

Bu qanun layihesini 2022-yili 7-aprél küni amérika kéngesh palatasining ezasi marko rubiyo (Marco Rubio), awam palatasining ezasi yang kim (Young Kim) we ami béra (Ami Bera) qatarliqlar amérika dölet mejliside tonushturghan؛ shuningdek bu qanun layihesi arqiliq xitay komunistik partiyesi rehberlik qiliwatqan xitay hökümitining Uyghurlargha qarita ijra qiliwatqan türlük ziyankeshliklirini cheklesh hemde Uyghurlarning nöwettiki ehwalining yaxshilinishigha türtke bolush nishan qilin'ghan. Shu qétimliq tonushturush yighinida marko rubiyo ependi: “Xitay kompartiyesi Uyghurlar we bashqa türkiy tilliq xelqlerge yürgüziwatqan qirghinchiliq we kishilik hoquq depsendichilik qilmishlirini qebih yosunda dawam qilduriwatqanda, amérika hökümiti bu qabahetlerge süküt qilsa bolmaydu. Shunga men dölet mejlisidiki barliq xizmetdashlirimni bu qanun layihisini maqullashqa awaz bérishke dewet qilimen” dégen idi.

Mezkur qanun layihesige awaz bérish 1-dékabir küni chüshtin kéyin ötküzüldi. Amérika dölet mejlisining ezaliri ayrim-ayrim söz qilip, Uyghurlar duch kéliwatqan ziyankeshliklerning hélimu dawam qiliwatqanliqini, shunga bu jehette amérika hökümiti téximu emeliy herketlerde bolushi lazimliqini, bundaq ehwalda “Uyghur siyasiti qanun layihesi”ni maqullashning buningdiki bir muhim qedem hésaplinidighanliqini tekitlidi.

 Mezkur qanun layihesining maqullinishi xitay hökümitining Uyghurlargha qiliwatqan ziyankeshlikliri we qirghinchiliqliri izchil dawam qiliwatqan bir peytke toghra kelgen bolup, Uyghurlarning nöwettiki weziyiti üchün élip éytqanda zor tarixiy ehmiyetke ige, dep qaralmaqta. Téximu muhimi, bu qanun layihesi Uyghurlar heqqide maqullan'ghan ilgiriki qanunlardinmu küchlük yosunda otturigha chiqip, amérika hökümiti we tashqiy ishlar ministirlikini Uyghurlar heqqide bir qatar emeliy heriketlerni qilishqa mejburlaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.