Amérikadiki eng chong musulmanlar teshkilati xitayning Uyghurlargha yürgüzgen sayahet kontrolluqini tenqid qilghan

Amérikadiki eng chong musulman teshkilatliridin “Amérika islamiy munasiwetler kéngishi” 4-féwral bayanat élan qilip, xitay hökümitining Uyghur musulmanlirigha qarita kemsitish we kontrol xaraktérlik sayahet cheklimisi qoyghanliqini tenqid qilghan.

Amérikadiki mezkur musulmanlar teshkilati bu tenqidni kishilik hoquqni közitish teshkilatining bu heptining bashlirida tekshürüsh doklati élan qilip, xitayning Uyghurlargha yürgüzgen kemsitish xaraktérlik sayahet cheklimisining Uyghurlarni görüge tutush arqiliq, ularning herikitini kontrol qiliwatqanliqi ashkarilishi munasiwiti bilen élan qilghan. Bayanatta mundaq déyilgen: “Biz xitay kompartiyesining Uyghur musulmanlirigha ularning ana wetinide kemsitish xaraktérlik sayahet cheklimisi qoyghanliqini tenqidleymiz. Tramp hökümitini bu cheklimige qarshi awaz chiqirishqa hemde herqandaq döletning öz xelqining sayahet erkinlikini chekleydighan bashqa siyasetlirige qarshi turushqa chaqirimiz”.

Kishilik hoquqni közitish teshkilati bu heptining bashlirida élan qilghan doklatida, xitayning Uyghur élini ziyaret qilmaqchi bolghan chet eldiki Uyghurlar, shundaqla chet elni ziyaret qilmaqchi bolghan Uyghurlargha qattiq shertlerni qoyidighanliqi, chet elni ziyaret qilmaqchi bolghan Uyghurlarning a'ile ezalirini görüge tutup qalidighanliqini bildürgen. Doklatta yene Uyghurlarning türkiyege oxshash köp sanliq nopusi musulman bolghan “Sezgür döletler” ni ziyaret qilishi cheklinidighanliqi tekitlen'gen idi.

“Amérika islamiy munasiwetler kéngishi” yene amérikaning yéqinda ikki xitay shirkitini jazalighanliqi, bolupmu Uyghur musulmanlirini teqip qilish arqiliq, kishilik hoquqning depsende qilinishigha téxnika jehettin yardem qilghan bir shirketni jazalighanliqini qarshi alidighanliqini bildürgen. Nöwette, “Amérika islamiy munasiwetler kéngishi” xitayning Uyghurlarni basturushi we amérikaning bu jehettiki jazalash tedbirlirini izchil ochuq-ashkara qollap kéliwatqan az sandiki musulman teshkilatlirining biridur. Bu teshkilat ötken yili 11-ayda amérika 29 xitay shirkitini Uyghur mejburiy emgiki sewebidin qara tizimlikke kirgüzgendimu, amérikaning bu herikitini qarshi alghan idi.