Wang xuning Uyghur élini xitaylashturushta dawamliq ching turushni tekitligen

Xitay kompartiyesining “Shinjang ishliri” gha mes'ul eng hoquqluq emeldari bu hepte Uyghur élide xizmet tekshürüshide bolup, xitay kompartiyesining 2017-yilidin bashlighan mezkur rayonni omumyüzlük xitaylashturush pilanida dawamliq ching turush we qet'iy izchillashturushni telep qilghan. Xitay hökümet taratqulirining xewer qilishiche, xitay kompartiyesi merkizi komitéti siyasiy biyurosining da'imiy ezasi, xitay memliketlik siyasiy meslihet kéngishining re'isi wang xuning 21-öktebirdin 24-öktebirgiche Uyghur élide tekshürüshte bolghan. Bu, xitay kompartiyesining “Shinjang ishliri” gha mes'ul eng hoquqluq emeldari - wang xuningning 2023-yili 5-aydin béri, 2-qétim Uyghur élide tekshürüshi we rayondiki yerlik emeldarlargha Uyghur élini xitaylashturushta dawamliq ching turush toghriliq yolyoruq bérishidur.

Wang xuning 2023-yili 5-ayda élip barghan xizmet tekshürüshidimu, rayonni “Jungxu'a milliti ortaq gewdisi éngini kücheytish” namidiki xitaylashturushta ching turushni, “Jungxu'ani söyüsh uruqini her bir kishining qelbide, bolupmu yashlarning qelbide chongqur bixlandurush” ni telep qilghan. Shinxu'a agéntliqining xewer qilishiche, wang xuning bu qétim mundaq dégen: “Shinjang xizmitini yaxshi ishlesh üchün, biz choqum ijtima'iy muqimliqni saqlashni birinchi orun'gha qoyup, shinjang jem'iyitining chong weziyitidiki muqimliqni dawamliq saqlishimiz kérek. Milliy we diniy xizmetni puxta ishlep, shinjangni medeniyet arqiliq ozuqlandurushni chongqur qanat yaydurushimiz, her millet ammisini jungxu'a milliti ortaq gewdisi éngini chongqur yétildürüshke yéteklishimiz, ‛beshni étirap‚ qilishini kücheytishimiz lazim.”

Shinxu'a agéntliqining xewiridin, wang xuningning bu qétim xizmet tekshürüshining Uyghur nopusi zich olturaqlashqan qeshqer bilen xotenni asasliq nuqta qilghanliqi melum bolmaqta. Wang xuningning Uyghur élide tekshürüshte bolushi waqit jehettin, amérika, en'gliye, kanada, norwégiye, chéxiye, firansiye, finlandiye, awstraliye qatarliq 15 gherb döliti 22-öktebir küni b d t 3-komitétining 79-qétimliq yighinida ortaq bayanat élan qilip, xitayni b d t kishilik hoquq organlirining Uyghurlargha alaqidar barliq tewsiyelirini orundashqa, jümlidin xalighanche tutqun qilin'ghan barliq tutqunlarni qoyup bérishke chaqirghan bir peytte élip bérilghan. Kishilik hoquq teshkilatlirining qeyt qilishiche, xitay hökümiti Uyghur élide 2017-yilidin béri, “Jungxu'a milliti ortaq gewdisi éngi” berpa qilish namida keng kölemlik xitaylashturush herikiti élip barmaqtiken.