Amérika istixbarat bash diréktori: “Xitayning iqtisadi qiyinchiliqi urush xewpini kücheytmekte”

Amérika döletlik istixbarat bash diréktori awril héynés (Avril Haines) xitayning éghir iqtisadi qiyinchiliqi uning teywen yaki rayondiki bash reqiblirige hujum qilish xewpini kücheytiwatqanliqini agahlandurghan.

Awril héynésning tekitlishiche, xitay hökümiti amérikani xitayning bash kötürüshige tosqunluq qilishta teywenni qollanmaqta dep eyiblewatqan bir peytte, teywen heqiqeten xitay bilen amérika arisidiki yoshurun toqunushning partlash nuqtisi bolmaqta iken.

Awril héynés xanim 11-mart amérika kéngesh palatasi istixbarat alahide komitétida guwahliq bergende yene, amérikaning “Aldin'ala yadroluq zerbe bérishi” din endishe qiliwatqan xitay rehberlirining, buninggha qarshi halda xitayning gherbi qismigha 300 din artuq quruqluqtin qoyup bérilidighan qit'eler'ara balistik yadro orunlashturghanliqini éytqan.

Awril héynésning bildürüshiche, xitayning yadro qorallar küchini üzlüksiz ashurushi, uning muntizim herbiy toqunush qozghash jasaritige ilham bérish xewpini kücheytken. Awril héynés mundaq dégen: “Xitay hökümiti amérikaning teywen'ge yardem bérishni kücheytishige qarita téximu küchlük tedbirlerni alidu.”

Yéqindin béri xitayning teywen'ge tehdit sélishi téximu kücheygen, xitay bilen filippinning jenubiy déngizdiki sürkilishi artqan, shundaqla hindistan bash ministiri modining ötken hepte xitay hökümiti “Jenubiy tibet” dep atap kéliwatqan arunachal prédash shtatini ziyaret qilishi xitayning naraziliqigha uchrighan bir peytte awril héynés bu agahlandurushta bolghan.

Melum bolushiche, xitay hökümiti modining arunachal prédashta ziyarette bolushigha diplomatik yosunda naraziliq bildürüp, bu rayonning xitay zémini ikenlikini, hindistanning herikiti ikki döletning ixtilaptiki chégra mesililirini “Téximu murekkepleshtüridighanliqi” ni éytqan. Amérika kéngesh palatasi istixbarat alahide komitétining guwahliq yighinida, awril héynéstin bashqa amérika fédératsiye tekshürüsh idarisi, merkizi istixbarat idarisi, dölet bixeterlik idarisini öz ichige alghan alte asasliq istixbarat orginining mes'ulliri guwahliq bergen.