Xitay iqtisadida chékinish we astilash dawam qilmaqta

Xitay iqtisadining dawamliq arqigha chékinip, iqtisadi ösüsh sür'itining izchil astilawatqanliqi, shundaqla pak chéki bazirining chüshüwatqanliqi bildürülmekte. “Washin'gton pochtisi” gézitining xewer qilishiche, xitay iqtisadining chékinishi soda ixtilapining téximu keskinlishishidin dérek bersimu, emma xitay hökümiti heriketke ötüshni yenila xalimaywatmaqta iken.

“Washin'gton pochtisi” ning 20-séntebirdiki xewiride, bu ayning xitay üchün échinishliq bir ay bolghanliqi, yéqinda élan qilin'ghan iqtisadi sanliq melumatlarda körsitilishiche dunyadiki 2-chong iqtisadi gewde bolghan xitayning iqtisadi ösüsh sür'iti kütkendinmu téz astilighanliqi bildürülgen. “Washin'gton pochtisi” ning qeyt qilishiche, bu weziyet analizchilarda xitayning bu yilliq iqtisadi ösüsh sür'itini besh pirsentke yetküzüsh pilani emelge ashmasliqi mumkin, dégen qiyasni peyda qilmaqta iken.

Xewerde, xitayning sana'et ishlepchiqirishi we parche sétishi astilighanliqi, shuning bilen bir waqitta uning pay chéki baziri we öy-mülükke meblegh sélishning bashchilap chüshüwatqanliqi, ishsizliq éghirliship, pul qimmitining örlishi yenila jiddiy mesile bolup turuwatqanliqi bildürülgen. Xewerde qeyt qilinishiche, shundaqtimu xitay emeldarliri 2008-yilidiki yer shari pul-mu'amile kiriziside qollan'ghandek keng kölemlik iqtisadni heriketlendürüsh pilani yolgha qoyushni xalimaywatmaqta iken.

Xewerde, gerche xitayning amérika we yawropa ittipaqi bilen bolghan soda ixtilapi küchiyiwatqan, bu hal xitayning öz mehsulatlirini chet elde sétishi iqtidarini ajizlawatqan bolsimu, emma uning ilghar ishlepchiqirishqa hessilep meblegh sélish we iqtisadi tereqqiyatta éksportqa tayinish istratégiyesini dawamlashturuwatqanliqi bildürülgen. “Washin'gton pochtisi” ning qeyt qilishiche, xitay öy-mülük baziridiki chöküsh xitay iqtisadidiki kashilining merkizidin orun almaqta iken. Halbuki xewerde, xitay öy-mülük baziri yéqinqi waqitlarghiche xitay iqtisadining charek qismini teshkil qilidighanliqi we xitay ottura qatlam sinipining asasliq bayliq menbesi bolup kelgenliki tekitlen'gen.