Xitay iqtisadining chöküshi téximu chongqurlashqan

Xitay hökümiti künséri kasatlishiwatqan xitay iqtisadini janlandurush üchün, iqtisadni qutquzushning yéngi tedbirlirini élan qilghan bir peytte, uning 3-pesildiki iqtisadi üsüsh sür'iti ötken yilning bashliridin buyanqi eng töwen sewiyege chüshken.

Xitay döletlik istatistika idarisining 18-öktebir élan qilghan sanliq melumatida körsitilishiche, xitayning séntebirning axirlirighiche bolghan 3-pesillik iqtisadiy ösüsh sür'iti aran 4. 6 Pirsent bolup, ötken yilning oxshash mezgilidikidin az bolghan hemde xitayning uni 5 pirsentke yetküzüsh pilanigha yetmigen. Lékin BBC ning xewiride, buning yenila analizchilarning kütkinidin azraq yaxshi dep qariliwatqanliqi bildürülmekte. Emma xitayning iqtisadiy éshishini ölchesh ölchimi boyiche, bu uning iqtisadining arqa-arqidin ikki pesilde esli pilandiki 5 pirsentlik ösüsh sür'itidin asta bolushi hésablinidiken.

Xewerlerde, iqtisadiy ösüsh sür'itining astilishi, xitay hökümitining qayghusini téximu éghirlashturidighanliqi qeyt qilinmaqta. “Xelq'ara pul fondi” xitay bölümining sabiq diréktori asward prasad BBC gha qilghan sözide, “Hökümetning bu yilliq iqtisadiy ösüsh nishani jiddiy tehdit astida qalghandek qilidu” dégen.

Xitay hökümiti téxi ötken heptide iqtisadni qutquzushning bir yürüsh tedbirlirini élan qilghanidi.

BBC Ning bildürüshiche, bezi iqtisadshunaslar xitayning iqtisadni qutquzush tedbirliri sewebidin, uning 4-pesillik iqtisadiy ösüsh sür'itining pilandiki 5 pirsentke yétishige ümidwar qarisimu, “Emma bu da'irilerning iqtisadtiki qurulma xaraktérlik riqabetlerni hel qilishini telep qilidu” dep qarimaqta iken. Halbuki, chet'eldiki xitay analizchiliri xitay hökümitining iqtisadni qutquzush pilanining peqet hazirqi iqtisadiy kasatchiliqtin qutulushtiki waqitliq chare ikenlikini, kompartiye hakimiyitining tewrep qélishidin qorqup uning xitay iqtisadidiki qurulma xaraktérlik riqabetlerni tüptin hel qilishigha guman bilen qaraydighanliqini bildürmekte.