Xitay iqtisadida chöküshning dawamlishidighanliqi texmin qilinmaqta

Yéqinqi yillardin buyan xitay iqtisadi kasatliship, öy-mülük baziri köpükke aylinip, istémalchilarning ishenchi töwenlep méngiwatqan bolup, chet ellik meblegh salghuchilarmu xitaydin qéchishqa bashlighan.

Xitay merkiziy bankisi ösüm nisbitini töwenlitip, pütkül xitay banka sistémisigha 25 milyard dollar meblegh éqitqanliqini jakarlighan bolsimu, iqtisadshunaslar we meblegh salghuchilar buningmu ishqa yarimaydighanliqini otturigha qoymaqta.

“Wal strét zhurnili” gézitining 25-iyul bergen xewiride éytilishiche, xitay merkizi bankisi bu yil kirgendin buyan iqtisadni janlandurush üchün pul-mu'amile jehette köpligen kengchil siyasetlerni yolgha qoyghan bolsimu, xitay iqtisadida yaxshilinish körülmigen. Xitay merkiziy bankisining bu qétim ösüm nisbitini chüshürüsh arqiliq xitay iqtisadini qayta yükseldürmekchi bolushi xitay emeldarlirining nöwettiki iqtisadiy chöküshke bolghan endishisini ashkarilap qoyghan.

Shi jinping bu qétim xitay kompartiyesining 20-nöwetlik 3-omumiy yighinida “Xitayni amérika bilen riqabetlisheleydighan qudretlik pen-téxnika dölitige aylandurush” nishanini otturigha qoyghan bolup, bu nishan'gha yétish üchün iqtisadni güllendürüsh xitayning bügünki eng halqiliq nishani bolup qalghan. Emma “Arman'gha tushluq derman yoq” dégendek, xitay iqtisadi dawamliq chékinish halitide turmaqta iken.

Xewerde éytilishiche, xitayning bu yilqi ikkinchi pesillik iqtisadi éshish nisbiti töwenlep 4.7 Pirsentke chüshüp qalghan bolup, birinchi pesildiki 5.3 Pirsenttin töwen bolghan؛ xitay pulining dollargha ayribashlash nisbiti ösüp, hazir 1 dollargha 7.22 Yüen toghra kelgen. Xitayning qerzi éship kétiwatqan bolup, xitay hökümiti öy-mülük bazirining rasttinla köpükke aylinishidin ensirimekte iken.

Xitay kompartiyesining 20-nöwetlik 3-omumiy yighindin kéyin élan qilghan islahat pilanimu chet el karxaniliri we meblegh salghuchilargha ishench bérelmigen bolup, xongkongdiki pay chéki chüshüp ketken. Yene kélip, amérikaning sabiq pirézidénti donald trampning kelgüside saylinip qalsa, xitaygha éghir baj qoyidighanliq wedisimu xitay iqtisadigha yoshurun zerbe bermekte iken.