Xitayning sana'et ishlepchiqirish paydisi yuqumdin béri téz azayghan

Xitay sana'et ishlepchiqirishidin alidighan paydisi kowid-19 wirusi yuqumidin béri téz sür'ette azayghan. Xitay döletlik istatistika idarisining sanliq melumatliridin ashkarilinishiche, bu yil 9-ay xitayning sana'et ishlepchiqirish paydisi, kowid-19 wirusi yuqumidin béri eng téz azlighan bir ay bolghan. Amérika CNBC qanilining bu xeqtiki xewiride, xitayning bu yil 9-aydiki sana'et ishlepchiqirishidin alghan paydisi 17.8 Pirsent azayghandin kéyin, 9-ayda téximu shiddetlik aziyip, ötken yilning oxshash mezgilidikidin 27.1 Pirsent töwenligenliki, bu, xitayning sana'et ishlepchiqirishidin alghan paydisining 2020-yili 3-aydin béri eng köp töwenlishi hésablinidighanliqi bildürülgen. Xewerde qeyt qilinishiche, xitayning sana'et ishlepchiqirishidin alghan paydisi 2020-yili 3-ayda 37.9 Pirsent töwenligen.

Lékin bu qétimqi töwenlesh xitay iqtisadi kasatliship, ishsizliq artqan, xitay öy-mülük baziri kirizisqa patqan bir waqitta meydan'gha kelmekte. Xitay hökümiti yéqinda iqtisadni qutquzushning bir qatar tedbirlirini élan qilghan bolsimu, lékin buning xitay iqtisadini qutquzushta qanchilik ünümlük rol oynishi yenila guman qozghap kelgen. Xewerlerde, xitay memliketlik xelq qurultiyining kéler ayning bashlirida yighin échip, iqtisadni qutquzushning konkrét tepsilatlirini élan qilidighanliqi qeyt qilinmaqta.

Xitay döletlik istatistika idarisi yéqinda élan qilghan yene bir sanliq melumatida, xitay iqtisadining 3-pesildiki éshish sür'iti 4.6 Pirsentke chüshüp, pilandiki 5 pirsentke yetmigenlikini bildürgen. Xewerlerde, mutexessislerning xitayda istémal telipining yéterlik bolmasliqi, shundaqla ishlepchiqirish bahasining shiddetlik töwenlishi, sana'et shirketlirining paydisigha tesir qilghan, dep qarawatqanliqi qeyt qilinmaqta. Xitay re'isi shi jinping 2 yildek “Nöl kowid” siyasitini qattiq ijra qilip, 2022-yili 26-noyabir ürümchidiki bir binada yüz bergen ot apiti keltürüp chiqarghan memliket xaraktérlik naraziliq herikitidin kéyin, yuqum qamilini bikar qilghan bolsimu, lékin shuningdin buyan xitay iqtisadining eslige kélishi qiyinlashqanidi.