Amérika kéngesh palata ezasi osof "Shinjang quyash énigiyesi mehsulatliri" gha tayinishqa xatime bérishni telep qildi

Muxbirimiz erkin
2021-09-24
Share

Amérika kéngesh palatasining démokratlar partiyesidin bolghan ezasi jon osof, amérikaning Uyghur élida ishlepchiqirilghan xitay quyash énirgiye mehsulatlirigha tayinishqa xatime bérishni telep qilghan. Uning éytishiche, amérika hawa kélimat özgirishige qarshi küresh qilish bilen bir waqitta, quyash énirgiye teminat zenjirini mejburiy emgektin xaliy qilish üchünmu küresh qilishi kérek iken. Jon osof amérika prézidéntining yer shari kélimat ishliri alahide wekili jon kerriy, amérikaning Uyghurlar bilen kélimat mesiliside "Qiyin tallash" qa duch kelgenlikini bildürüp, arqidinla bu sözlerni qilghan.

Jon kerriyning sözi kishilik hoquq teshkilatlirida endishe qozghighan idi. Jon osof 23-séntebir "Blumbérg xewerliri" ning ziyaritini qobul qilghanda, amérikaning kishilik hoquqta muresse qilishigha bolmaydighanliqi, buning "Her ‍ikkilisini qilish kérekliki", buning "Exlaqiy mejburiyet" ikenlikini tekitligen.

U mundaq dégen: "Kélimat mesiliside biz hazirla heriketke ötüshimiz, qul emgiki mesilisidimu hazirla heriketke ötüshimiz kérek… biz zor derijide xitayning Uyghur mejburiy emgikige tayinip ishlepchiqirilidighan quyash énirgiyesi mehsulatlirigha yölinip qalduq."

Jon osofning éytishiche, u quyash énirgiye teminat zenjirini amérikagha qayturup kélish, quyash énirgiye mehsulatlirini amérikada ishlepchiqirish, prézidént baydénning kélimat ögirishini kontrol qilish pilanigha uyghunlishish, quyash énirgiye teminat zenjirini Uyghur mejuriy emgikidin xaliy qilish üchün "Quyash énirgiye qanun layihesi" sun'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet