Америка дөләт бихәтәрлики министирлиқиниң муавин министири хитай маллирини елиштин агаһландурди

Мухбиримиз җәвлан
2020-12-16
Share

Америка дөләт бихәтәрлики министирлиқиниң муавин министири кен каксинел(Ken Cuccinell) 15-декабир "һәптилик хәвәрләр" торида мақалә елан қилип, "хитай мали" маркиси болған һәр қандақ буюмни селивелиштин агаһландурған.

Милад байрими вә йеңи йил байрими келиш һарписида елан қилинған бу мақалә бу мәзгилдә америкада шәкиллинидиған юқири истемал қизғинлиқини мәқсәт қилип йезилған болуп, хитайда ишләнгән мәһсулатларниң пәқәт "хитай мали" дегән маркидинла ибарәт әмәслики тәкитлинип мундақ дейилгән: "байрамлиқ совғат үчүн өйдикилириңиз вә достлириңиз үчүн сетивалған пахта мәһсулатлири бәлким қуллуқ әмгәктин кәлгән болуши мумкин. Йәни у мәһсулатлар һазирқи дәврдики әң еғир кишилик һоқуқ дәпсәндичиликиниң таварға айландурулған шәклидур. Хитай дөлити қоллаватқан бу заманиви қуллуқ түзүминиң зиянкәшликигә учраватқанлар пәқәт диний вә мәдәнийәт әркинлики тәләп қиливатқан аз санлиқ милләт хәлқидур, әмма улар динсиз хитай коммунистлириниң суйиқәстлик зораванлиқиға учриди".

Бу мақалидә юқириқи сөзниң пакити сүпитидә 3 милйондин артуқ уйғур, қазақ мусулманлириниң 1300 әтрапидики лагерларға қамилип еғир қийин-қистаққа учриғанлиқи, өлтүрүлгәнлики, аялларниң әң еғир хорлуққа учриғанлиқи вә туғмас қиливетилгәнлики, балиларниң ата-анисидин тартивелинип хитайчә тәрбийәлиниватқанлиқи дегәндәк қәбиһ қирғинчилиқ җинайәтлири көрситилгәндин кейин, коммунист хитай һөкүмитиниң уларни қул қилип кийим-кечәк, лөңгә, кирлик, әдиял, хам йип дегәндәк көплигән пахта мәһсулатлирини ишләпчиқиришқа салғанлиқи алаһидә әскәртилгән.

Мақалидә көрситилишичә, америка дөләт бихәтәрлик министирлиқи билән чегра вә таможна қоғдаш идарисиниң қайта һәрикәтлинип, уйғур районидики һәрбий орган болған биңтуәнниң пахта мәһсулатлирини тутуп қелиш буйруқи чүшүридикән. Чегра вә таможнини қоғдаш идариси елан қилған "дуня пахта мәһсулатлири иҗазәтнамиси" да биңтуән вә униң қармиқидики орунларниң қул әмгәк мәһсулатини ишләпчиқиришқа четилидиғанлиқи ениқ көрситилгән. Америка һөкүмитиму уйғур районидики мәҗбурий әмгәк вә башқа кишилик һоқуқ зораванлиқи мәсилисини һәл қилиш үчүн бир қатар тәклип вә сиясәтләрни елан қилған.

Мақалиниң ахирида мундақ дейилгән: "бу байрам мәзгилидә биз америкалиқ истемалчиларниң хитай мелиниң унчилик қәдир-қиммәткә лайиқ әмәсликини тонушқа чақириқ қилимиз. Лагерларни әслитидиған мәһсулатларни сетивелип, америка истемалчилири вә америка базирини чиритишни халимаймиз. Биз америка ишчилири вә иш тапалмай қийниливатқан башқа саһәдики кишиләрни хитайда мәҗбурий қул қилиниватқан ашу кишиләр билән риқабәтләштүрмәймиз вә бу арқилиқ хитайниң йүзигә қара сүркәймиз. Биз америка ширкәтлириниң дөлитимиз 155 йил аввал ғалиб кәлгән рәзил күчләрниң җувисида тәрлишигә һәргиз йол қоймаймиз".

Көзәтчиләрниң қаришичә, муавин министир кен каксинелниң бу мақалиси бир тәрәптин йиллардин буян хитай мелиға бағлинип қалған вә хитайдики қуллуқ әмгикини техи тонуп йәтмигән америка истемалчилирини агаһландуруш болса, бир тәрәптин, америка дөләт бихәтәрлик министирлиқи қатарлиқ һоқуқлуқ органларниң хитай мәһсулатлирини киргүзмәслик қарари вә сияситиниң күчлүк болидиғанлиқидин бешарәт беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт