Amérika dölet bixeterliki ministirliqining mu'awin ministiri xitay mallirini élishtin agahlandurdi

Muxbirimiz jewlan
2020-12-16
Share

Amérika dölet bixeterliki ministirliqining mu'awin ministiri kén kaksinél(Ken Cuccinell) 15-dékabir "Heptilik xewerler" torida maqale élan qilip, "Xitay mali" markisi bolghan her qandaq buyumni séliwélishtin agahlandurghan.

Milad bayrimi we yéngi yil bayrimi kélish harpisida élan qilin'ghan bu maqale bu mezgilde amérikada shekillinidighan yuqiri istémal qizghinliqini meqset qilip yézilghan bolup, xitayda ishlen'gen mehsulatlarning peqet "Xitay mali" dégen markidinla ibaret emesliki tekitlinip mundaq déyilgen: "Bayramliq sowghat üchün öydikiliringiz we dostliringiz üchün sétiwalghan paxta mehsulatliri belkim qulluq emgektin kelgen bolushi mumkin. Yeni u mehsulatlar hazirqi dewrdiki eng éghir kishilik hoquq depsendichilikining tawargha aylandurulghan sheklidur. Xitay döliti qollawatqan bu zamaniwi qulluq tüzümining ziyankeshlikige uchrawatqanlar peqet diniy we medeniyet erkinliki telep qiliwatqan az sanliq millet xelqidur, emma ular dinsiz xitay kommunistlirining suyiqestlik zorawanliqigha uchridi".

Bu maqalide yuqiriqi sözning pakiti süpitide 3 milyondin artuq Uyghur, qazaq musulmanlirining 1300 etrapidiki lagérlargha qamilip éghir qiyin-qistaqqa uchrighanliqi, öltürülgenliki, ayallarning eng éghir xorluqqa uchrighanliqi we tughmas qiliwétilgenliki, balilarning ata-anisidin tartiwélinip xitayche terbiyeliniwatqanliqi dégendek qebih qirghinchiliq jinayetliri körsitilgendin kéyin, kommunist xitay hökümitining ularni qul qilip kiyim-kéchek, löngge, kirlik, ediyal, xam yip dégendek köpligen paxta mehsulatlirini ishlepchiqirishqa salghanliqi alahide eskertilgen.

Maqalide körsitilishiche, amérika dölet bixeterlik ministirliqi bilen chégra we tamozhna qoghdash idarisining qayta heriketlinip, Uyghur rayonidiki herbiy organ bolghan bingtu'enning paxta mehsulatlirini tutup qélish buyruqi chüshüridiken. Chégra we tamozhnini qoghdash idarisi élan qilghan "Dunya paxta mehsulatliri ijazetnamisi" da bingtu'en we uning qarmiqidiki orunlarning qul emgek mehsulatini ishlepchiqirishqa chétilidighanliqi éniq körsitilgen. Amérika hökümitimu Uyghur rayonidiki mejburiy emgek we bashqa kishilik hoquq zorawanliqi mesilisini hel qilish üchün bir qatar teklip we siyasetlerni élan qilghan.

Maqalining axirida mundaq déyilgen: "Bu bayram mezgilide biz amérikaliq istémalchilarning xitay mélining unchilik qedir-qimmetke layiq emeslikini tonushqa chaqiriq qilimiz. Lagérlarni eslitidighan mehsulatlarni sétiwélip, amérika istémalchiliri we amérika bazirini chiritishni xalimaymiz. Biz amérika ishchiliri we ish tapalmay qiyniliwatqan bashqa sahediki kishilerni xitayda mejburiy qul qiliniwatqan ashu kishiler bilen riqabetleshtürmeymiz we bu arqiliq xitayning yüzige qara sürkeymiz. Biz amérika shirketlirining dölitimiz 155 yil awwal ghalib kelgen rezil küchlerning juwisida terlishige hergiz yol qoymaymiz".

Közetchilerning qarishiche, mu'awin ministir kén kaksinélning bu maqalisi bir tereptin yillardin buyan xitay méligha baghlinip qalghan we xitaydiki qulluq emgikini téxi tonup yetmigen amérika istémalchilirini agahlandurush bolsa, bir tereptin, amérika dölet bixeterlik ministirliqi qatarliq hoquqluq organlarning xitay mehsulatlirini kirgüzmeslik qarari we siyasitining küchlük bolidighanliqidin bésharet béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet