Xitayda öy-mülük kirizisi chongqurliship namayishlargha yol achmaqta

Xitay öy-mülükchilik kespining misli körülmigen kirizisqa pétip qélishi xitayda namayishlarning köpiyishige yol achqan.

“Asiya iqtisad xewerliri” (Nikkei) gézitining xewer qilishiche, xitayda aldinqi bir ayliq meblegh sélish we öy-mülük sétilish miqdari aldinqi yildikige qarighanda 11 pirsent töwenligen bolup, köp qisim sheherlerdiki öy bahasimu körünerlik töwenlep ketken.

Xitay nöwette misli körülmigen öy-mülük kirizisige duch kelgen bolup, xitaydiki eng chong qurulush shirketliri bankidin alghan qerzlirini qayturalmighan. Shuning bilen birge bu sahediki teminligüchiler, höddige bergüchiler we qurulush ishchiliri birdek nechche aylap ma'ashsiz qalghan؛ öy sétiwélish üchün barche bisatini sélip bergen kishiler bolsa yillardin béri pütken öylirige érishelmigen idi.

Hazir bu qalaymiqanchiliqning netijiside xitay boyiche namayishlar köpiyip ketken bolup, amérikadiki “Erkinlik sariyi” ning “Xitaydiki ixtilapni nazaret qilish” türining hésablishiche, 2022-yili 6-aydin 2023-yili 10-ayghiche bolghan ariliqta xitayda öy-mülük sahesige chétishliq 1777 namayish yüz bergen iken.

Xewerde déyilishiche, xitay hökümiti gerche bu kirizisni hel qilish üchün öy-mülük sahesini qollaydighan bir qatar tedbirlerni yolgha qoyup baqqan bolsimu, biraq bu tedbirlermu kirizisni hel qilishta yéterlik bolmighan.

 “Asiya iqtisad xewerliri” gézitining déyishiche, hazir xitayda künige az dégende 50-70 qiche namayish yüz bériwatqan bolup, shénjén, shi'en we jéngju sheherliridiki namayishlar bir qeder keng kölemlik bolmaqta iken. Xitay hökümiti bolsa bu namayishlarni qorqutush wasitisi bilen cheklep turuwatqan bolup, ular ölkilik we yerlik partiye kadirlirigha nazaret qilish, qorqutush, zorawanliq, tutup turush we tekshürüsh arqiliq namayishni qisqartish wezipisini yükligen.