Xitay pelestinning xamas we fatax teshkilatlirini yarashturush üchün béyjinggha teklip qilghan

Xitay, pelestin islami jihad qoralliq teshkilati xamas bilen uning reqibi bolghan fatax, yeni pelestin milliy azadliq herikiti teshkilatini béyjinggha teklip qilip, ularni yarashturushqa sahibxaniliq qilmaqchi bolghan. Xewerlerde, xamas we fatax wekillirining béyjinggha qarap yolgha chiqqanliqi qeyt qilinmaqta. Xitayning amérika tashqi ishlar ministiri bilinkén 26-aprél ikki künlük xitay ziyaritini axirlashturushining arqisidinla fatax bilen xamasni béyjinggha teklip qilip, 2007-yildin béri öz ara düshmenliship kelgen bu ikki teshkilatni “Yarashturmaqchi” bolushi diqqet qozghidi.
Bilinkén 26-aprél béyjingda ötküzgen axbarat yighinida, özining xitay re'isi shi jinping we bashqa xitay emeldarliri bilen ottura sherqni öz ichige alghan yer shari kirizislirida xitayning qandaq “Ijabiy rol” oynishini muzakire qilghanliqini éytqanidi.

Lékin “Roytérs agéntliqi” ning bildürüshiche, amérika fatax herikitini qollisimu, emma xitayning amérika tereptin térrorluq teshkilati dep békitilgen xamasni fatax bilen yarashturmaqchi bolghanliqidin bi'aram bolmaqta iken. 2007-Yildin béri ghezzeni kontrol qilip kelgen xamas, ötken yili 10-ayda isra'iliyege qoralliq hujum qilip, 1200 isra'iliyelikni öltürgen, 253 kishini görüge tutuwalghan؛ bu isra'iliyening ghezzege keng kölemlik qayturma heriket qollinishini keltürüp chiqarghanidi.
“Roytérs agéntliqi” ning bildürüshiche, isra'iliyening qayturma zerbiside hazirghiche 34 mingdin artuq pelestinlik ölgen. Lékin isra'iliye bu herbiy herikitining térrorluq hujumigha qarshi heqliq mudapi'e ikenlikini qeyt qilip keldi. Xitayning xamas bilen fatax wekillirini béyjinggha teklip qilishi amérika tashqi ishlar ministirliqining bir qanche kün awwal yilliq kishilik hoquq doklati élan qilip, xitayning Uyghurlargha irqiy qirghinchiliq qilishi dawamlishiwatqanliqini jakarlishigha bildürgen inkasi depmu qaralmaqta. Pelestin b d t da izchil xitayning qollishigha érishipla qalmay, pelestinmu xelq'ara sehnilerde xitayning “Shinjang siyasiti” izchil qollap kelgenidi.