Хитайниң чәт әлләрдики сақчи понкитлирини тәкшүрүш башланди

Мухбиримиз әзиз
2022.11.07

Пуқравий тәшкилатлардин болған “муһапизәтчиләрни қоғдаш” тәшкилати узун мәзгиллик тәкшүрүштин кейин, 2022-йили сентәбирдә хитай һөкүмитиниң чәт әлләрдики 110 сақчи понкити һәмдә уларниң хитай һөкүмити иҗра қиливатқан чегра һалқиған бастурушларни ишқа ашуруштики роли шәрһийләнгән доклатни елан қилған иди. 7-Ноябирға қәдәр америка, әнглийә, германийә, канада, австрийә, италийә, ерландийә қатарлиқ 14 дөләт өзлириниң бу мәсилини тәкшүриватқанлиқини билдүргән.

Мәзкур тәшкилатниң тор бетидә 7-ноябир күни елан қилинған бу һәқтики баянатта көрситилишичә, бу сақчи понкитлири хитай җамаәт хәвпсизлик тармақлири вә “бирликсәп бөлүм”лириниң зич һәмкарлиқида барлиққа кәлгән болуп, уларниң асаслиқ вәзиписи чәт әлләрдә хитай һөкүмитигә қарши оттуриға чиққан паалийәтләрни уҗуқтуруш, шуниңдәк чәт әлләрдики хитай пуқраси болған кишиләрни қанунсиз йосунда хитайға өткүзүп бериш хизмитигә маслишиш икән.

“муһапизәтчиләрни қоғдаш” тәшкилатиниң бу доклати елан қилинғандин кейин, һәрқайси дөләтләр арқиму-арқидин һәркәткә өткән һәмдә өзлириниң хәвири болмиған әһвалда қурулған бу муәссәсәләрниң паалийәтлирини тәкшүрүшкә башлиған. Әмма бу хил сақчи понкитлири қурулған бир қисим дөләтләр, болупму хитай билән қоюқ иқтисадий алақиси болған дөләтләр бу һәқтә инкас билдүрүшни рәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.