Xitayda 10 yashliq yaponiyelik balining öltürülüshi, shi jinpingning “Öchmenlik ma'aripi” gha so'al peyda qilghan

Xitayning shénjén shehiride 10 yashliq yaponiyelik balining pichaqlap öltürülüshi, xitayda yolgha qoyulghan “Öchmenlik ma'aripi” heqqide küchlük bes-munazire qozghighan.

CNN Téléwiziyesining bu heqtiki xewirige qarighanda, bu weqe xitaydiki ijtima'iy taratqularda küchlük munazire qozghighan. Nurghun kishiler buning xitaydiki chékidin ashqan milletchilik we xitay asasiy ma'aripida yaponiyege munasiwetlik “Öchmenlik terbiyesi” bilen munasiwetlik ikenlikini bildürgen.

Shénjénda öltürülgen balining dadisi yaponiyelik, apisi xitay bolup, u aldinqi hepte shénjéndiki bir mekteptin qaytish yolida bir xitay er teripidin pichaqlap öltürülgen. Bu xitayda yaponiyelik balilargha qaritilghan ikkinchi qétimliq pichaqliq hujum bolup hésablinidiken.

Béyjing da'iriliri yuqiriqi zorawanliq hujumlirigha seweb bolghan muddi'ani tilgha almay, ularni peqetla “Yekke hadise” dep teswirligen. Halbuki, tordiki munaziriliride buni xitayda keng kölemde élip bériliwatqan “Öchmenlik ma'aripi” bilen baghlighan munaziriler ewj alghan.

Ismini ashkarilashni xalimighan bir shénjén ahalisi CNN muxbirigha qilghan sözide, “Men bir xitay bolush süpitim bilen bu weqedin bek ghezeplendim we nomus hés qildim. Bu zorawanliq emeliyette uzun muddetlik öchmenlik terbiyesining netijisi… balilarda kichikidin tartip öchmenlik peyda qilishning néme paydisi bar?” dégen.

Xitay kompartiyesining bash sékrétari shi jinping hakimiyet béshigha olturghandin buyan “Xitay wetenperwerliki” terbiyesini keng kölemde ewj aldurghanliqi, buning xitayda “Chékidin ashqan milletchilik” ni keltürüp chiqiriwatqanliqi heqqide türlük bes-munaziriler otturigha chiqmaqta. Sheksizki, buning eng tipik ipadisi xitay da'irilirining Uyghurlargha qaritiwatqan irqiy qirghinchiliqida eks etken.