Amérika tor hujumi sewebidin xitayning “Béyjing yongshin jichéng téxnologiye guruhi” ni jazalighan

Amérika hökümiti ötken jüme küni, yeni 3-yanwar küni xitayning “Béyjing yongshin jichéng téxnologiye guruhi hessidarliq cheklik shirkiti” ni “Flaks teyping” namliq dangliq xitay xakkérlar guruppisining arqisidiki küch, dep jazalighan.

Amérika tashqiy ishlar ministirliqi bu heqtiki bayanatida, “Béyjing yongshin jichéng téxnologiye guruhi hessidarliq cheklik shirkiti” ning xitay dölet xewpsizlik ministirliqigha baghliq zor kölemlik xitay hökümitining bir höddigerlik shirkiti ikenliki, bu shirketning xakkérlirining béyjingning körsetmisi boyiche heriket qilip, amérika we chet elning halqiliq ul eslihelirini hujum nishan qilip kelgenlikini bildürgen. Roytérs agéntliqining bildürüshiche, buningdin ilgiri gherb hökümet emeldarliri béyjingni baza qilghan bu shirketni “Flaks teyping” xakkérlar guruppisining arqisidiki küch, dep eyiblep kelgen iken.

Amérika fédératsiye tekshürüsh idarisining bashliqi kristofér réy ötken yili 9-ayda, bu shirketni “Xitayning hökümet xewpsizlik organlirigha istixbarat toplash we razwitka pa'aliyetlirini élip bérish” bilen eyibligen idi. Roytérs agéntliqining bildürüshiche, ötken yili oxshash waqitta élan qilghan bir doklattimu, amérika, en'giliye, awstraliye, kanada we yéngi zélandiye tor emeldarliri “Béyjing yongshin jichéng téxnologiye guruhi hessidarliq cheklik shirkiti” ning yer shari boyiche 250 mingdin artq eslihege suqunup kirgenlikini eyibligen iken. Lékin xitay hökümiti amérika we uning ittipaqdashlirini “Béyjing yongshin jichéng téxnologiye guruhi hessidarliq cheklik shirkiti” we “Flaks teyping” weqeside “Heqsiz yekün” chiqirip, xitayni “Asassiz eyiblesh” bilen tenqid qilghan.

Amérikaning “Béyjing yongshin jichéng téxnologiye guruhi” gha yürgüzgen émbargo qarari, amérika maliye ministirliqi yéqinda bir xitay xakkérlar guruppisining mezkur ministirliqning tor bétige suqunup kirip, nurghun höjjetlerni oghrilap ketkenliki, bu hujumning ministirliq émbargo ishxanisini nishan qilghanliqini bildürüshining arqisidin yürgüzülgen.