Iqtisadiy jazagha uchrighan xitay shirketlirining qorallirining amérikigha éqip kiriwatqanliqi ashkarilandi

ICIJ Yeni xelq'ara tekshürgüchi muxbirlar birleshmisi 12-ayning 10-küni Uyghurlarni basturushta rol oynighan (xitay hökümitige yardem qilghan) xitay shirketliri yasighan qoral-yaraqlarning amérika we bashqa döletlerge éqip kiriwatqanliqini ashkarilighan.

Xelq'ara tekshürgüchi muxbirlar birleshmisi xitay qoral shirketlirining, jümlidin shinjang saqchilirigha aptomatik miltiq teminligen, yeni Uyghurlarni basturushta rol oynighan xitay shirketlirining amérika, yawropa we hindistandiki qoral satidighan shirketlerge qoral-yaraq satqanliqini ilgiri sürgen.

Mezkur shirketlerdin chungching jyenshé sana'iti (Chongqing Jianshe) téksasqa jaylashqan shisiko amérika (Xisico USA) shirkiti we bashqa amérika qoral satquchilargha nechche yüz miltiq satqan. Bu shirket yene qoral-yaraghni “Tenterbiye buyumliri” süpitide gérmaniyening hamburg shehirige jaylashqan owchiliq üsküniliri shirkiti xenis reyij (Hans Wrage & Co) gha yollighan.

Xelq'ara tekshürgüchi muxbirlar birleshmisi teripidin tekshürülgen karxana arxipi we bashqa uchurlarda körsitilishiche, jyenshé sana'itining xitayning jenubiy sana'et guruhi bilen munasiwiti barliqi ispatlan'ghan. Bu shirket xitayning bir qanche herbiy shirketliridin biri bolup, Uyghurlarni basturush yaki éghir kishilik hoquq depsendichilikide türtkülük rol oynighanliqi sewebidin iqtisadiy jazagha uchrighaniken.