Tetqiqatchi adriyan zénz xitayning mejburiy emgek siyasitini aqlighan Kaiser Kuo ni tenqidlidi

Amérika kommunizm qurbanliri xatire fondining aliy tetqiqatchisi adriyan zénz 29-öktebir küni X hésabida bir yürüsh uchur élan qilip, “Sinika podkest” (Sinica Podcast) bilogining riyasetchisi kayser ko (Kaiser Kuo) ning xitay shinxu'a muxbirliri bilen ötküzgen söhbitide, xitayning mejburiy emgek siyasitini aqlighanliqini tenqidligen. Adriyan zéniz amérikada yashawatqan hemde nisbeten erkin pikir qilidighandek körünüp özige xéridar toplighan kayser koning meqsitini ashkarilap mundaq dégen: “Keyser ko ikki neper shinxu'a muxbiri bilen ötküzgen söhbitide , ular üchün bir tereplik sehne hazirlap bergen hemde xitayning ‛jem'iyettiki qiyinchiliqlarni ünümlük hel qilghanliqi‚ ni otturigha qoyghan, ular buninggha Uyghur emgek küchlirini yötkeshning mejburiy emgek emeslikini misal qilip körsetken” .

Adriyan zénz bu söhbette shinxu'a muxbiri yang lyuning “Xitay hökümiti xitayche usul bilen dölet ichidiki ijtima'iy mesililerni hel qildi” dégen gépini, andin Uyghur emgek küchlirini yötkeshni buning bir misali qilip körsetkenlikini tenqidligen. Adriyan zénizning körsitishiche, yang liyu bu yerde mejburiy emgekni peqet xitay bilen amérika otturisidiki mesile dep qarighan bolup, amérika hökümitining xitaydiki Uyghur emgek küchlirini yötkesh pilanini mejburiy emgek dep qarimasliqi kéreklikini éytqan. Kayser ko uning sözige reddiye bermeyla qalmastin, yang liyuning xitay-amérika munasiwetliri heqqidiki qarashlirigha qoshulidighanliqini bildürgen hemde bu yerde Uyghurlarning kishilik hoquq depsendichiliki mesilisining yoqluqini, belki amérikaning öz merkezchilik siyasitining rol oynawatqanliqini tekitligen.

Adriyan zéniz uchurida mundaq deydu: “Bu del shinjangning nöwettiki teshwiqatigha, yeni bu rayonda yolgha qoyulghan siyasetlerni ‛namratlarni yölesh, tereqqiy qildurush, ishqa orunlashturush we esebiylikni tügitish” dep teswirlishige del mas kélidu. Bu yerde xitayning dölet taratqusigha xizmet qilidighan ikki muxbirni ziyaret qilip oxshimighan pikir élish bashqa ish, xitay hökümitining mejburiy siyasiti, bolupmu shinjang siyasitini ‛xitayche usul‚ dep aqlash hemde buninggha reddiye bermeslik bashqa ishtur”.

Munasiwetlik uchurlargha qarighanda, kayser koning esli ismi go yigu'ang (郭怡广) bolup, öz waqtida xitayda dangq qazan'ghan “Tang sulalisi muzika etriti” ni qurghan shexs iken. U hazir xitayning “Beydu” we “Yoku” torining xelq'ara alaqe ishliri mes'uli iken, u qurghan “Sinika podkest” xitayning siyasiti, iqtisadi we xelq'ara munasiwetlerge da'ir témilarda söhbet élip baridiken.