Хитай өзбекистанлиқ оқуғучиларни оқуш пули мукапати билән тәминләш һәққидә келишим имзалиған

Вашингтондин мухбиримиз ирадә тәйярлиди
2024.04.02

Хитай өзбекистанлиқ оқуғучиларни оқуш пули мукапати билән тәминләш һәққидә келишим имзалиған. Өзбекистан җумһурийити алий маарип, илим-пән вә йеңилиқ яритиш министири конратбай шарапоф билән уйғур аптоном райониниң рәиси әркин тунияз имзалиған келишимгә көрә, хитай өзбекистан пуқралирини уйғур елидики алий мәктәпләрдә оқуши үчүн оқуш мукапат пули билән тәминләйдикән.

“йеңи өзбекистан” тор гезитиниң хәвиридин қариғанда, икки тәрәп йәнә маарип, тәтқиқат, техника вә башқуруш, оқутқучилар вә пән-техника хадимлири өзара зиярәт қилиш вә алмаштуруш қатарлиқ җәһәтләрдә һәмкарлиқ вә тәҗрибә алмаштуруш үчүн алий маарип аппаратлири вә илмий органлири арисида биваситә һәмкарлиқ орнитидикән һәмдә йәнә илмий тәтқиқатлар үчүн бирләшмә тәтқиқат гурупписи қуридикән.

Бу келишим, уйғур аптоном районлуқ һөкүмәтниң рәиси әркин туниязниң оттура асия дөләтлиригә қаратқан рәсмий зиярити давамида имзаланған. У, 28-март күни өзбекистан пайтәхти ташкәнткә йетип берип, өзбекистан пирезиденти шавкәт мирзияйеф билән көрүшкән вә икки тәрәп арисида көп хил һәмкарлиқни илгири сүрүш һәққидә сөһбәтләшкән иди.

Хитай һөкүмитиниң йеқиндин буян оттура асия әллири билән алақини күчәйтишкә алаһидә әһмийәт бериши вә буниңда уйғур аптоном районини көврүк қилип қоллиниши диққәт қозғимақта. Қазақистандики сиясәтшунас қәһриман ғоҗамбәрди радийомизға қилған сөзидә, хитай һөкүмитиниң бу арқилиқ һәм уйғурларға қаритиватқан җинайәтлирини ақлаш һәм иқтисадий мәсилилирини һәл қилиштин ибарәт мәқсәтлиригә йетишни көзләватқанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.