Xitay xakkérliri amérika pirézidént namzati donald trampning a'ilisini hujum nishani qilghan

Amérikaning 2024-yil 11-ayning 5-küni ötküzülidighan pirézidént saylimi harpisida xitay xakkérlirining pirézidént namzatliri we ularning yéqinlirigha qilghan hujumi köpiyip ketken.

“Nyu-york waqti géziti” 29-öktebir élan qilghan bir xewerde éytilishiche, xitay xakkérliri amérikaning téléfon alaqe sistémisigha kirip, sabiq pirézidént donald trampning a'ilisi we baydin hökümiti emeldarlirini hujum nishani qilghan. Amérika tashqi ishlar ministirliqi emeldarliri, donald trampning oghli érik tramp (Erik Trump), küy'oghli jarid kushnér (Jared Kushner) qatarliqlar hemde amérika kéngesh palatasi köp sanliq partiye lidéri chak shumér (Chuck Schumer) ni öz ichige alghan démokratlar asasliq hujum nishani bolghan.

“Wol-stérét zhurnili” géziti 6-öktebir küni élan qilghan bir xewerde éytilishiche, xitayning “Yentey borini” dep atalghan bir xakkérlar guruppisi keng belbagh torigha kirip, amérika fédératsiye hökümitining mexpiyetlik sistémisidin uchur oghrilighaniken.

Roytérs agéntliqi 29-öktebir élan qilghan xewerde körsitilishiche, amérika tashqi ishlar ministirliqi, tramp a'ilisi bu xakkérliq weqesi heqqide héchqandaq inkas qayturmighan. Aqsaray hemde dölet xewpsizlik idarisi tor bixeterlikini nazaret qilish orgini (CISA) mu bu heqte uchur qayturmighan. Xitay bu xil xakkérliq hujumining perde arqisida rol oynawatqanliqini inkar qilip kéliwatqan bolup, xitayning washin'gtondiki elchixanisimu bu heqte soralghan so'algha jawab bermigen.