Америка һөкүмити хитайниң 26 пахта ширкитини уйғур мәҗбурий әмгикигә четишлиқ дәп чәклигән
2024.05.16
16-Май күни, америка һөкүмити уйғур мәҗбурий әмгики билән ишләпчиқирилған мәһсулатларниң америка базириға киришиниң алдини елиш үчүн, хитайниң пахта тиҗарити билән шуғуллинидиған 26 ширкити вә амбирини қара тизимликкә киргүзүп, улардин пахта импорт қилишни чәклигән.
Америка ана вәтән хәвпсизлики министирлиқиниң баянатида көрситилишичә, тизимликтики пахта ширкәтлириниң көпинчиси уйғур елиниң сиртида болсиму, бирақ улар пахтини уйғур елидин киргүзидикән.
Америка һөкүмити 2021-йили “уйғур мәҗбурий әмгикиниң алдини елиш қануни” ни иҗра қилғандин буян 65 орунни сода қара тизимликигә киргүзгән болуп, мәзкур 26 пахта ширкити вә завутлири бу тизимликкә қошулған әң йеңи орунлар болуп һесаблинидикән.
Ана вәтән хәвпсизлик министири алеһандро майоркас баянатта йәр алған сөзидә мундақ дегән: “юқиридики бу чәклимә мәсулийәт билән тиҗарәт қилидиған ширкәтләрниң диққәт билән иш көрүшигә ярдәм бериду, шундақ болғандила биз бирликтә мәҗбурий әмгәк мәһсулатлириниң дөлитимизгә киришиниң алдини алалаймиз”.
Америка ана вәтән хәвпсизлики министирлиқиниң 26 хитай ширкити вә муәссәсәсигә қаратқан бу чәклимиси америка дөләт мәҗлиси әзалириниң алқишиға еришкән. Америка авам палата әзаси кирис симис вә кеңәш палата әзаси җеф мерклей дәрһал баянат елан қилип, бу қарарни қоллайдиғанлиқини ипадә қилиш билән биргә, бу чәклиминиң “уйғур мәҗбурий әмгики билән булғанған бирикмә киристаллиқ силитсий, алюмин, бирикмә хилорид вә йерим бирикмә тала санаити қатарлиқларға кеңәйтилишини” тәләп қилған.