Хитай һөкүмити 2024-йили ичидә хоңкоң билән уйғур ели арисидики “һәмкарлиқ” ни күчәйтишни көзлимәктә

Вашингтондин мухбиримиз ирадә тәйярлиди
2024.03.21

Хитай һөкүмити уйғур ели билән хоңкоң арисидики өз ара алақә вә һәмкарлиқни күчәйтмәкчи болған.

Хитайниң “тәңритағ тори” ниң хәвиридин қариғанда, 20-март күни, уйғур аптоном районлуқ сиясий кеңәш билән “хоңкоң заманивилаштурушни илгири сүрүш мутәхәссислири җәмийити” тунҗи қетимлиқ йетәкчи гуруппа йиғини өткүзүп, икки тәрәп оттурисидики алақә вә һәмкарлиқни күчәйтиш һәққидә сөһбәтләшкән.

Хәвәрдин қариғанда, йиғинда уйғур ели билән хоңкоңниң 2024-йилдики алмаштуруш вә һәмкарлиқ пиланини пухта илгири сүрүш тәләп қилинған болуп, униңда мунулар дейилгән:

 “барлиқ әза орунлар вә карханилар түр бекитиш вә башқа хизмәтләрни яхши ишләп, һәмкарлиқ даирисини йәниму кеңәйтиши; шинҗаңчә алаһидиликкә игә кәсипләрни күчәйтиши; хоңкоң, авмен вә чәт әлләрдин техиму көп саяһәтчиләрни җәлп қилиши; һәмкарлиқ усулини йеңилап, мәбләғ селишни илгири сүрүши керәк. ”

Йиғинда йәнә, уйғур ели билән хоңкоң арисидики “тәкшүрүп тәтқиқ қилиш, сода сөһбити, оқутуш вә тәрбийәләш хизмәтлирини илгири сүрүп, алмаштуруш вә һәмкарлиқниң тәртиплик тәрәққиятиға капаләтлик қилиш” му тәләп қилинған.

Уйғур район даирилири билән хоңкоң арисидики һәмкарлиқни ашурушқа мунасивәтлик бу йиғин ечилиштин бир күн бурун, йәни 19-март күни хоңкоң парламенти “дөләт бихәтәрликни қоғдаш қанун лайиһәси” ни мақуллиғаниди. Хиянәтчилик, бузғунчилиқ, топилаң чиқириш, дөләт мәхпийәтликини оғрилаш вә җасуслуқ қилмишлири җинайәт қилип бекитилгән һәмдә җазалаш маддилирини өз ичигә алған бу қанунниң мақуллинишини хәлқаралиқ кишилик һоқуқ органлири вә сиясий көзәткүчиләр “хоңкоңдики демократийә вә әркинликниң пүтүнләй вәйран болуши, хоңкоңлуқларниң мутләқ искәнҗигә елиниши” дәп баһалиған иди.

Хоңкоң билән уйғур ели оттурисидики достлуқ вә һәмкарлиқни илгири сүрүшкә мунасивәтлик тәшвиқатлар 2023-3-айда хоңкоң алаһидә райониниң бейҗиңда турушлуқ иш башқармисиниң мудири җең веййүәнниң үрүмчидә зиярәттә болуши билән башланған. Әйни чағда америкадики хоңкоңлуқ паалийәтчиләр радийомизға билдүргән инкаслирида, “икки тәрәп алақисиниң күчийип қелиши хитайниң уйғур елини идарә қилиштики қаттиқ қол тәдбирлирини хоңкоңға көчүрүп беришни мәқсәт қиливатқанлиқини көрситиду” дәп баһалиғаниди. Хитай һөкүмити 2022-йили уйғур аптоном райониниң “террорлуққа қарши алаһидә сақчи қисимлири” ниң башлиқини хоңкоңда турушлуқ хитай хәлқ азадлиқ армийәсиниң баш қаравулханисиға башлиқ қилип йөткигәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.