Yawropa xitayning tok aptomobillirigha yuqiri baj qoyghan

Yawropa özining mashina bazirini qoghdash üchün xitayning tok aptomobillirigha 45 pirsent tamozhna béji qoyghan. Bu ehwal yawropa bilen xitay otturisidiki soda jéngini keskinleshtürüshi mumkin iken.

“Nyu-york waqti géziti” ning 30-öktebir élan qilghan xewirige qarighanda, 30-öktebir küni yawropa rehberliri yawropa aptomobil bazirining tereqqiyatigha kapaletlik qilish, adil soda muhiti yaritish üchün xitayning tok aptomobilliridin yuqiri baj élishta birlikke kelgen. Bu qarar xitayning dölet yardimige érishken xitay tok aptomobil shirketlirining yawropa bazirini adil bolmighan shekilde monopol qilishining aldini élishta muhim rol oynaydiken.

Xewerde éytilishiche, xitayning tok aptomobilliridin élinidighan baj eslidiki 10 pirsenttin biraqla 45 pirsentke östürülgen bolup, mushu ölchemde 5 yil dawam qilidiken. Bundaq bolghanda, yawropa istémalchiliri xitayning aptomobillirini burunqidin yuqiri bahada sétiwélishqa mejbur bolidiken.

Yawropa aptomobil sana'iti soda jem'iyiti (ACFA) ning bildürüshiche, xitayning tok aptomobillirining yawropa bazirini igilesh nisbiti ilgiri 3 pirsenttin 20 pirsentke örligen bolup, eger yuqiri baj qoymighanda, yawropadiki aptomobil zawutlirida ishsizliq köpiyip kétidiken.

Amérika bilen kanada xitayning tok aptomobilliridin 100 pirsent baj alghanliqi üchün, xitay shirketliri amérika baziridin chékin'gen. Yawropa gerche xitayning tok aptomobillirini import qilishni pütünley cheklimigen bolsimu, yuqiri baj qoyush arqiliq yawropa aptomobil sana'itini qoghdimaqchi bolghan.

Halbuki, gérmaniyediki aptomobil shirketliri xitaygha nurghun meblegh salghan bolup, xitayning öch élishidin qorqup xitayning tok aptomobilidin yuqiri baj élishqa qarshi turghan we adil, erkin riqabetning muhimliqini otturigha qoyushqan. Xitayning aptomobil shirketliri bolsa hökümetke yawropaning gaz mashiniliridin yuqiri baj élish arqiliq qayturma zerbe bérish teklipini bergen. Bir qisim xitay shirketliri, mesilen biyadi (BYD) yawropada yaki yawropa erkin soda rayoni ichidiki türkiyede zawut qurush arqiliq yawropaning yuqiri béjigha taqabil turmaqchi bolghan.