“Zimistan” tori lagérdiki nurghun Uyghurning fujyen ölkisige yötkep kélinip, emgekke séliniwatqanliqini ashkarilidi

Italiyediki “Zimistan” tori 23‏-dékabir küni tekshürüsh doklati élan qilip, lagérdiki nurghun Uyghur tutqunlirining xitayning fujyen ölkisidiki jinjyang, chu'enjow qatarliq sheherlerge yötkep kélinip, zawut-karxanilarda mejburiy emgekke séliniwatqanliqini ashkarilidi.

Bu jaydiki uchur menbelirining “Zimistan” torigha bildürüshiche, bu Uyghur ishchilirining hemmisi sabiq lagér tutqunliri iken. Bir uchur menbesi ularning lagérlardin qoyup bérilipla fujyen'ge yötkep kélin'genlikini bildürgen. U “Eger bu Uyghurlar xitayning bashqa ölkilirige bérip ishleshni ret qilsa, lagérgha qayturulup kétilidighanliqi” ni ilgiri sürgen. Bu uchur menbesining qeyt qilishiche, Uyghurlarning bashqa ölkilerge yötkep apirilishidiki meqset ularni “Islam dini we esebiyliktin xali qilip, ularning tézrek xitaylishishini ishqa ashurush” iken.

Doklatta ichkiridiki bu Uyghurlarning nazaret astida yashaydighanliqi, ularning diniy ibaditi cheklinip, ulargha wetenperwerlik, qanun-tüzüm we xitay tili ögitilidighanliqi, ularning her düshenbe küni bayraq chiqirish murasimigha qatnishidighanliqi, murasimni saqchilarning nazaret qilidighanliqi tekitlen'gen.

Bir Uyghur ishchi “Zimistan” torining xadimigha bergen uchurida saqchilarning da'im yataq we yanfonlirini tekshürüp turidighanliqini bildürgen. Fujyenning chüenjow shehiridiki yene bir uchur menbesi bu sheherdiki Uyghur ishchilirining her küni 13 sa'et ishlisimu, lékin intayin az ma'ash bérilidighanliqini ilgiri sürgen. Chüenjowdiki bir Uyghur ishchi “Zimistan” torigha “Biz her küni bek charchap kétimiz. Chünki artuq ishlishimiz kérek. Mexpiy ibadet qilayli désekmu uninggha waqtimiz we halimiz qalmaydu,” dégen.

Buning aldida Uyghur aptonom rayonining re'isi shöhret zakir bayanat élan qilip, lagérdiki kursantlarning hemmisi “Oqush püttürgenliki” ni élan qilghan. Lékin közetküchiler uning sözining gumanliq ikenliki, lagérdiki bezi tutqunlarning zawut-karxanilargha yötkep kétilgen bolushi mumkinlikini bildürgen idi.