Zumret obul ottura asiya döletliri parlamént ezalirigha xitayning qanun döliti ikenlikini pesh qilghan

Xitayche “Tengritagh tori” we “Shinjang géziti” ning 29-öktebir chiqarghan xewirige qarighanda, Uyghur aptonom rayonluq xelq qurultiyi da'imiy komitétining mudiri zumret obul ürümchide ottura asiya döletliri parlamént ezaliri muhakime sinipi ezalirini kütüwalghanda, xitayning “Qanun döliti” ikenlikini maxtighan.

Kütüwélish murasimida söz qilghan zumret obul xitay bilen ottura asiya döletliri otturisidiki “Tarixiy dostluq” ni tekitlesh bilen birge, xitay kompartiyesi bash sékrétari shi jinpingning rehberlikide “Tereqqiy qilip gülliniwatqan shinjang” da kishilik hoquqning “Qanun bilen kapaletke ige qilin'ghanliqi” ni, ottura asiya döletliri bilen birlikte qanunchiliq qurulushini ilgiri sürüshni, shundaqla iqtisad, medeniyet saheliride hemkarlishishni ümid qilidighanliqini bildürgen.

Bu muhakime sinipigha qatnashqan qazaqistan, qirghizistan, tajikistan we özbékistan parlamént ezalirimu ayrim-ayrim pikir bayan qilip, “Xitayning shinjang ölkisi bilen her sahede hemkarliqni dawamliq kücheytish” tileklirini bildürgen.

Közetchilerning qarishiche, xitayning namda eng hoquqluq apparati we qanun chiqirish orgini bolghan xelq qurultiyida wezipe ötewatqan zumret obulning bu yerde ottura asiyadin kelgen parlamént ezalirigha xitayning “Qanun döliti” ikenlikini pesh qilishi diqqet qozghaydighan nuqta bolup, xitayning gherb döletliride tenqidliniwatqan “Shinjang siyasiti” ni “Shinjangni qanun boyiche idare qilish” namida sirtqa teshwiq qiliwatqanliqi körünüp turidu.

Xitay “Shinxu'a tori” ning xewiridin melum bolghinidek, Uyghur aptonom rayonluq xelq qurultiyi 2024-yil 8-ayning 24-küni chaqirghan 35-nöwetlik mudirlar yighinda “Sh u a r xelq qurultiyi da'imiy komitétining amérika hökümitining shinjang heqqidiki jaza tedbirlirige qet'iy qarshi turush” témisidiki qarar layihesi maqullan'ghanidi. Siyasiy analizchi ilshat hesen bu heqte radiyomizgha qilghan sözide, aptonom rayonluq xelq qurultiyining héchqandaq küchi we tesiri yoq organ bolushigha qarimay, peqet dölet obrazi üchün tiklep qoyulghan, emeliyette bolsa xitay kompartiyesige xizmet qilidighan apparat ikenlikini bildürgenidi.