3 Чоң тәшкилат бирликтә “хәлқара уйғур мунбири” намида йиғин чақиридиғанлиқини елан қилди

Дуня уйғур қурултийи, “һәсәнә” тәшкилати вә хәлқара шәрқий түркистан тәшкилатлар бирлики рәһбәрлири җиддий йиғин чақирип, “хәлқара уйғур мунбири” намлиқ йиғин чақиришни қарар қилди. Мәзкур 3 чоң тәшкилатниң рәһбәрлири йиғип чақирип тәйярлиқ комитети қуруп, йиғинниң тәйярлиқ хизмәтлирини башливәтти.

Д у қ, мәзкур 3 чоң тәшкилатниң саһибханилиқи вә һәрқайси дөләтләрдики қериндаш тәшкилатларниң қоллиши билән 2022-йили 11-айниң 9-күнидин 10-күнигичә белгийәниң пайтәхти бирюсселда “хәлқара уйғур мунбири” намида тарихий әһмийәткә игә йиғин чақирилидиғанлиқини елан қилди.

Биз бу һәқтә мәлумат игиләш үчүн д у қ ниң диний хизмәтлиригә мәсул иҗраийә һәйити муавин рәиси, йиғинниң тәйярлиқ комитети мәсули турғунҗан алавуддин әпәнди вә түркийәдики хәлқара шәрқий түркистан тәшкилатлар бирлики рәиси һидайәтуллаһ оғузхан әпәндиләр билән сөһбәт елип бардуқ. Улар, йиғинниң тәйярлиқ комитети җиддий йиғин чақирип, “хәлқара уйғур мунбири” йиғининиң күнтәртипи билән йиғинда музакирә қилинидиған темиларни бекитип чиққанлиқини билдүрди.

Турғунҗан алавуддин әпәнди “хәлқара уйғур мунбири” йиғинини ечиштики мәқсәтниң “уйғур ирқий қирғинчилиқи” ни тохтитиш икәнликини баян қилди.

Турғунҗан алавуддин әпәнди “хәлқара уйғур мунбири” йиғининиң ечилиш мурасиминиң явропа парламентидики бәзи сиясий партийәләрниң саһибханилиқида явропа парламентиниң залида өткүзүлидиғанлиқини илгири сүрүп мундақ деди: “бу қетим белгийәдә чақирилидиған ‛хәлқара уйғур мунбири‚ йиғини зор тарихий әһмийәткә игә наһайити муһим йиғин. Мәзкур йиғинниң ечилиш мурасими явропа парламентидики бәзи сиясий партийәләрниң саһибханилиқида явропа парламентиниң залида өткүзүлиду. Бу йиғинға һәр қайси дөләтләрдики уйғурларни тәтқиқ қилидиған университет оқутқучилири, мутәхәссисләр, сиясийонлар, адвокатлар, қануншунаслар, аммиви тәшкилат мәсуллири, уйғур җамаәт әрбаблири, хәлқара кишилик һоқуқ тәшкилатлириниң мәсуллири тәклип бойичә иштирак қилмақчи. Йиғинда, буларни бир йәргә җәм қилиш арқилиқ, музакирә елип берип хитайниң шәрқий түркистанда елип бериватқан ‛ирқий қирғинчилиқи‚ни тохтитишниң чарә-тәдбирлирини бекитип чиқмақчи. Икки күн давамлишидиған йиғинда, һәр қайси темилар бойичә музакирә елип берилип, ‛уйғур ирқий қирғинчилиқи‚ ни тохтитиш үчүн хәлқарада өзара һәмкарлишиш тоғрисида қарар мақуллимақчи. Қисқиси бу йиғинда уйғур ирқий қирғинчилиқини тохтитиштики ортақ бир нишан бәлгиләп чиқилмақчи”.

Йиғинни уюштурғучи тәшкилатлардин бири болған истанбулдики хәлқара шәрқий түркистан тәшкилатлар бирлики рәиси һидайәтуллаһ оғузхан әпәнди, “хәлқара уйғур мунбири” йиғининиң хитай ирқий қирғинчилиқни давамлаштуруватқан бир мәзгилдә, явропа иттипақиниң мәркизи болған явропа парламентида чақирилидиғанлиқини, буниңға барлиқ уйғурларниң, болупму һәр қайси дөләтләрдики шәрқий түркистан тәшкилатлириниң мәсуллири билән уйғур зиялийлириниң вә җамаәт әрбаблириниң алаһидә әһмийәт берип иштирак қилиши керәкликини тәкитлиди.

Мутәхәссисләр бу қетимқи йиғинниң уйғур дәваси тарихида ечилидиған тунҗи чоң хәлқаралиқ йиғин икәнликини тәкитлимәктә.