Atushluq ikki aka-uka mehbus künesning qarabughra türmiside sirliq bir weqe seweblik jan özgen

Qarabughra türmisi künes nahiyesidiki eng kona bir türmidur. 2017-Yildin kéyin bu türme téximu kéngeytilgen we Uyghur élining hemme jayliridin mehbuslar élip kélin'gen. Melum bolushiche bu türmide, mushu ayning béshida sidiqjan ablikim we ablehet ablikim isimlik ikki aka-uka mehbus jan üzgen, töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

Iligha qarita téléfon ziyaretlirimiz dawamida, künes nahiyeside saqchi saheside xizmet qiliwatqan, emma özini ashkarilashni xalimighan bir xadim, qarabughra türmisidin ikki kishining jesiti chiqqanliqi we jeset yurtigha élip méngilghanda, özlirining jeset mashinisi ötidighan yollarda bixeterlik xizmiti ishligenlikini ashkarilidi. Uning déyishiche, shu künki ikki jesetning aka-ukilarning jesiti ikenliki uning diqqitini tartqan. Ölgüchilerning kimlikliri we ölüm sewebini sorash uning xizmet da'iriside bolmighanliqi üchün, bu heqte öz bashliqidin melumat soriyalmighan. Emma bu aka-ukilarning oxshash künde jan üzgenlikige qarap, ularning choqum melum weqede ölgenlikini perez qilghan. Yene bir nechche kün ötkendin kéyin, u xizmetdashlirining éghizidin shu jeset chiqishtin, bir kün burun qarabughra türmisining emgek meydanida, saqchilar bilen mehbuslar arisida toqunush yüz bérip ikki mehbusning ölgenliki heqqide gep tarqalghan.

 Uning déyishiche, bu uchurlar resmiy yighinda uqturulmighan, weqe échinishliq bolghanliqi üchün, mexpiy tutulushigha qarimay künestiki saqchi xadimliri arisida qulaqtin-qulaqqa tarqalghan.

 Biz ili oblasti we künes nahiyesidiki alaqidar organlargha téléfon qilip, bu weqe heqqidiki uchurning toghra xataliqini sürüshte qilduq. Xadimlar türmidiki herqandaq bir ishning mexpiy bolidighanliqini tekitlep, bu heqte melumat bérishni ret qildi. Künes nahiyelik türme bashqurush idarisidiki bir xadim, weqe heqqide özi melumat bermigen bolsimu, qarabughra türmiside bu xil weqelerdin xewerdar bir xadim bilen alaqilishishimizgha wasitichi boldi. Bu xadim téléfonimiz baghlan'ghan halette qara bughra türmisidiki xadim bilen ündidar arqiliq sözleshti. Ularning söhbitidin melum bolushiche, ikki aka-uka qarabughra türmiside jan üzgen. Söhbet dawamida, türme xadimi ikki aka-ukining késel sewebidin ölmigenlikini we ölüm sewebini perdazlashqa toghra kéliwatqanliqini eskertti.

 Biz arqidin bu türme xadimi bilen biwasite alaqileshtuq. Özining 25 yildin buyan qarabughra türmiside ishlewatqanliqini tilgha alghan bu xadim, ölgüchilerning akisining ismi sidiqjan, inisining ismi ablehet ikenlikini ashkarilidi. U yene bu aka-ukilarning yurtining atush ikenlikinimu ashkarilidi.

 Özini ashkarilashni xalimighan saqchi xadimning xizmetdashliridin anglishiche, emgek meydanida, akisining putidin sörep élip méngiliwatqanliqini körgen inisi saqchigha étilip kélip akisini saqchining qolidin ajratqan, bu chaghda bu saqchi bilen ikki aka-uka arisida deslepte tartishish-sörishish, arqidin toqunush kélip chiqqan, majiragha arilashqan üchinchi bir saqchi, aka-uka mehbusqa qarita oq chiqirip, ikkisining hayatigha xatime bergen. Déyilishiche, bu qarabughra türmisige tewe bir köktat étizliqida yüz bergen.

 Éniqlashlirimizda, aka-uka mehbuslarning isimliri melum bolghan bolsimu, ularning tutulush we késilish sewebliri melum bolmidi. Ilgiriki éniqlashlirimizda, misirdin qayturulghan bir qanche oqughuchining yurti atushta sotlinip, künes qarabughra türmisige yollan'ghanliqi melum bolghanidi. Éniqlashlirimizda yene ularning ölüm uchuri delillen'gen bolsimu, ölümige seweb bolghan toqunushning jeryani heqqidiki uchurlar téxi delillenmidi.