Австралийә ана тил мәктәп оқутқучилири: “хитайниң бесимиға учриғанлиқимизни һөкүмәткә мәлум қилдуқ! ”

Вашингтондин мухбиримиз меһрибан тәйярлиди
2024.03.07
Америка хитайниң дөләт атлап уйғурларға зиянкәшлик қилғанлиқи үчүн җаза елан қилди! Америка хитайниң дөләт атлап уйғурларға зиянкәшлик қилғанлиқи үчүн җаза елан қилди!
Yettesu

Австралийәниң викторийә иштатидики уйғур ана тил мәктипи 2-айниң 28-күни мәктәп намидин баянат елан қилип, мәзкур мәктәп вә мәктәптә пидаий болуп ишләватқан оқутқучиларниң хитайдин кәлгән һәр хил төһмәт вә бесимларға учраватқанлиқини билдүргән. Баянатта йәнә бу әһвалларниң викторийә иштатлиқ маарип идарисигә йәткүзүлгәнлики тилға елинған болуп, бу баянат елан қилинғандин кейин иҗтимаий мунбәрләрдә тегишлик инкас қозғиған.

Мәзкур баянатта дейилишичә, 2023-йилдин башлап хитайдин виза елип юртлириға қайтиватқан уйғурларниң көпийиши билән ана тил мәктәплиригә болған төһмәт характеридики һуҗумлар көпәйгән. Уларға кәлгән бәзи инкасларда ейтилишичә, хитай сақчилири юртлириға қайтқан уйғурлардин уларниң ана тил мәктәплиридә оқутқучилиқ қилған тарихиниң бар-йоқлуқи, балилириниң ана тил мәктипидә оқуған яки оқумиғанлиқи қатарлиқ әһвалларни сүрүштә қилған.

Викторийә ана тил мәктипиниң мудири надирә ханимниң билдүрүшичә, мәзкур мәктәпкә қилинған төһмәт түсини алған һуҗумлар бултур 7-8-айлардин башлап күчәйгән. Униң ейтишичә, уларниң мәктипидә пидаий болуп ишләватқан оқутқучилар арисида хитайдин виза елип юртлириға қайтқан оқутқучилар һазирчә йоқ икән. Әмма “ана тил мәктәплиридә оқутқучилиқ қилғанларни хитай сақчи даирилириниң сүрүштә қилғанлиқи” һәққидә иҗтимаий таратқуларда тарқалған ялған учурлар, шуниңдәк ана тил мәктәплиридики оқутқучиларниң шәхсийитигә қилинған тор һуҗумлири мәктәптә ишләватқан оқутқучиларға роһи җәһәттин әндишә вә бесим елип кәлгән. Шуңа улар маарип идариси қатарлиқ орунларға бу хилдики әһвалларни инкас қилған икән.

Җәнубий австралийә ана тил мәктипиниң оқутқучи вә оқуғучилири шундақла ата-аниларниң қатнишишида өткүзгән роза һейт вә “уйғур ана тил күни” паалийитидин көрүнүш. 2019-Йили 8-июн, аделайд австралийә.
Җәнубий австралийә ана тил мәктипиниң оқутқучи вә оқуғучилири шундақла ата-аниларниң қатнишишида өткүзгән роза һейт вә “уйғур ана тил күни” паалийитидин көрүнүш. 2019-Йили 8-июн, аделайд австралийә.
RFA/Uchqun

 Надирә ханимниң билдүрүшичә, улар мелборн шәһиридики викторийә иштатлиқ маарип идарисигә әһвални мәлум қилғанлиқини торда баянат елан қилиш шәклидә уйғур җамаитигә билдүргәндин кейин, иҗтимаий таратқуларда уйғурларниң охшимиған инкаслириға дуч кәлгән. Австралийәниң аделәйд шәһиридики “җәнубий австралийә ана тил мәктипи” ниң мудири юлтуз теюпҗан ханим бу мунасивәт билән зияритимизни қобул қилди. Униң ейтишичә, хитай һөкүмитиниң уруқ-туғқанлар арқилиқ қилған бесимлири вә намәлум шәхсләр тәрипидин оқутқучиларниң шәхсийитигә қилинған тор һуҗумлири сәвәбидин мәктәптики бир қисим оқутқучиларниң хизмитидин истепа беришкә мәҗбур болған.

 юлтуз ханимниң билдүрүшичә, австралийәдики уйғур ана тил мәктәплиригә қилиниватқан төһмәт вә тәһдит характеридики тор һуҗумлири йиллардин буян изчил давам қилип кәлгән. Әмма мәктәптики оқутқучиларниң шәхсийитигә һақарәт қилидиған исимсиз тор һуҗумлири хитай һөкүмити чәт әлләрдики уйғурларға виза беришкә башлиғандин кейин техиму күчәйгән.

Униң билдүрүшичә, һазирға қәдәр йүз бәргән тор һуҗумлири вә хитай һөкүмитидин кәлгән башқа бесимлар сәвәбидин йеқинда уларниң мәктипидин төт нәпәр оқутқучи хизмитидин истепа бәргән. Уларму бу әһвалларни йәрлик маарип идариси қатарлиқ орунларға инкас қилған икән.

Мәлум болушичә, хитай һөкүмитиниң “шинҗаң һәққидики һекайәләрни яхши сөзләш” тәшвиқати күчәйгәндин буян чәтәлләрдики бир қисим уйғурларға виза бериштәк “етибар сиясәтлири” муһаҗирәттә тездин “сиясийдин йирақ туруш” долқунини қозғиған. Шуниң билән биргә бәзи уйғурларниң йошурунчә виза елип вәтән зияритигә маңғанлиқи һәққидики параңлар түпәйлидин бу һәқтики түрлүк ғулғулилар йеқиндин буян һәрқайси тор сәһипилиридин орун елишқа башлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.