D u q re'isi dolqun eysa yawropadiki türk axbarat organlirini heriketke ötüshke chaqirdi

D u q re'isi dolqun eysa ependi 6-ayning 12-küni gérmaniyening köln shehiride ötküzülgen 2-nöwetlik “Yawropa türk médiyasi aliy yighini” da söz qilip, yawropa döletliridiki türk médiya, yeni axbarat organliri, sen'etchiler we zhurnalistlarni “Uyghur irqiy qirghinchiliqi” ni toxtitish üchün heriketke ötüshke chaqirghan. Bildürülüshiche, yawropa döletliride 5 milyon etrapida türk yashaydighan bolup, ular yawropada zor axbarat küchige ige iken.

RFA/Erkin Tarim

Yighinning échilish murasimida söz qilghan yawropa türk axbarat organliri we zhurnalistliri birliki re'isi aliy pasha aqwash ependi bu yighin'gha ishtirak qilghanlargha rehmet éytqandin kéyin, mezkur yighinni chaqirishtiki meqsiti heqqide toxtilip mundaq deydu : “Hörmetlik bash diplomatlar, parlamént ezaliri, axbarat xadimliri, ammiwi teshkilat mes'ulliri, jama'et erbabliri we qimmetlik zhurnalistlar bu yighinimizgha ishtirak qilghanliqinglar üchün hemminglargha rehmet éytimen. Shundaqla éhtiramimni bildürimen. Bu yighin'gha qatnashqan kishiler yawropadiki türklerning mesilisige köngül bölüwatqan kishilerdur. Yawropadiki türkler axbarat xizmetliride burun köp qiyinchiliqlargha duchar bolghan bolsimu bügünki künde bu qiyinchiliqlarni yéngip küchlük axbarat wasitilirige ige bolduq. Bu axbarat wasitilirimizdin paydilinip, mesililirimizni qandaq anglitimiz? xelqimizge qandaq paydiliq ishlarni qilalaymiz? nöwette saqliniwatqan mesililer néme? mana bularni hel qilishning yolliri toghrisida muzakire élip bérish üchün bu yighinni chaqirduq. Yighinning muweppeqiyetlik ötüshini tileymen”.

RFA/Erkin Tarim

D u q re'isi dolqun eysaning bildürüshiche gérmaniyening köln shehiride ötküzülgen “Yawropa türk médiyasi aliy yighini” gha türkiye we bezi yawropa döletliridin kelgen parlamént ezaliri, axbarat organlirining mes'ulliri, zhurnalistlardin bolup 500 etrapida kishi ishtirak qilghan.

D u q re'isi dolqun eysa ependi özining alahide teklip bilen ishtirak qilghanliqini, yighinning muweppeqiyetlik ötküzülgenlikini tekitlidi.

Igilishimizche amérika, kanada we yawropadiki axbarat wasitiliride Uyghurlarning hazirqi éghir weziyiti toghrisidiki xewerlerge köplep orun bériliwatqan bolsimu, lékin türkiye we islam dunyasidiki axbarat wasitiliride yéterlik derijide orun bérilmigen. Dolqun eysa ependi nutqida axbaratning tesir küchi toghrisida melumat bergendin kéyin yawropadiki türk médiyasini Uyghur irqiy qirghinchiliqini toxtitish üchün burchini ada qilishqa chaqirghanliqini tekitlidi.

D u q ning axbarat ishlirigha mes'ul mu'awin re'isi perhat muhemmidi ependi yawropa döletliridiki türklerning nopusining 5 milyon etrapida ikenlikini, bularning türk tili we bashqa tillarda axbarat wasitiliri barliqini, bu arqiliq yawropa siyasitige, shundaqla türkiye siyasitige tesir körsiteleydighanliqini, shunga dolqun eysa ependining bulargha chaqiriq qilishining zor ehmiyetke ige ikenlikini tekitlidi.

12-Iyun küni “Yighin” axirlashqandin kéyin köp sanda axbarat organlirining mes'ulliri d u q re'isi dolqun eysa bilen körüshüp Uyghurlar toghrisida bezi xizmetlerni qilidighanliqi toghrisida wede bergen. Dolqun eysa ependi bu heqte bizge melumat berdi.

Bu yighinning 1-nöwetlikimu 2019-yili gérmaniyede chaqirilghanidi.