8-Nöwetlik dunya Uyghur qurultiyining teyyarliq xizmetliri jiddiy dawam qilmaqta

Nöwette bosniyening paytexti sarayéwoda chaqirilghan 8-nöwetlik dunya Uyghur qurultiyining teyyarliq xizmetliri ghelibilik dawamlishiwatqan bolup, dunyaning her qaysi jayliridiki qurultay wekilliri sarayéwoning merkizige jaylashqan “Tetil méhmansariyi” gha kélishke bashlighan. Dunya Uyghur qurultiyi bérlin ishxanisining diréktori gheyur qurban neq meydandin ziyaritimizni qobul qilip, 8-nöwetlik qurultayning teyyarliq xizmitining xitayning tosqunluqigha qarimay ghelibilik halda jiddiy élip bériliwatqanliqini bildürdi.

RFA/Hebibulla izchi

Bu qétimqi 8-nöwetlik qurultayning bixeter ötküzülüshi üchün, sarayéwo saqchi idarisi bilen bixeterlik shirketliri birlikte tedbir alghan bolup, dunya Uyghur qurultiyi ayallar komitéti mudiri, xelq'ara alaqe diréktori zumret'ay erkinmu bu heqtiki tepsilatlarni radiyo anglighuchilar bilen ortaqlashti.

Bu bir nechche künidin béri 8-nöwetlik qurultayning yéqinlap kélishige egiship, xitayning her-xil pitne-pasat we tor hujumliri shiddet bilen dawam qiliwatqan bolup, qurultay ishxanisining bildürüshiche, bezi qurultay wekillirige, qurultay rehberlik namzatlirigha isimsiz nomurlardin tehdit, aldash, qorqutush téléfonliri kelgen. Gheyur qurban ependi bu ehwallar heqqidiki tepsilatlarni radiyo anglighuchilar bilen ortaqlashti.

Gheyur qurbanning bildürüshiche, hetta bezi wekillerge, bixeterlik mesilisi sewebidin bu qétimqi qurultayning emeldin qaldurulghanliqigha a'it uchur we élxetler kelgen, wekillerning bosna ayrodurumida tosuwélin'ghanliqi heqqide uchurlar tarqalghan.

RFA/Hebibulla izchi

Bu qétimqi 8-nöwetlik qurultaygha norwégiyedin yétip kelgen, norwégiye Uyghur jem'iyiti re'isi xelchem memtimin, sarayéwogha kirishte héchqandaq awarichilik bolmighanliqini bildürdi.

Xitay terepmu bu qétimqi qurultaygha buzghunchiliq qilish üchün ösek söz tarqitish, xakkérlash qatarliq her xil wasitilerni qollan'ghan. Shundaqla bügün, yeni 10-ayning 23-küni kimliki namelum bir nechche xitay puqrasi qurultay wekilliri chüshken méhmansaraygha kélip qurultay wekillirini sin'gha élishqa urun'ghan, emma neq meydandiki qurultay wekillirining bularni waqtida bayqap melum qilishi bilen méhmansaray amanliq xadimliri bu xitaylarni neq meydandin chiqiriwetken.

8-Nöwetlik dunya Uyghur qurultiyi chet eldiki Uyghur jama'itiningla emes, xelq'arada Uyghurlar mesilisige köngül bölüwatqan barliq kishilerning diqqitini tartiwatqan bolup, qurultay ishxanisining radiyomizgha bildürüshiche, bu qétimqi qurultaygha gérmaniye, ruminiye, amérika, chéxiye qatarliq döletlerning bosnadiki elchiliri qatnashqandin bashqa yene türkiye we bezi yawropa döletlirining parlamént ezalirimu közetchi süpitide qatnishidiken.